Сошиал медиагийн ихэнх агуулга ямар нэг үйл явдал эсвэл хэн нэгнийг шүүмжлэхэд чиглэгддэг. Тиймээс “монголчууд хэт их шүүмжлэмтгий болжээ. Зүгээр суудаг, завтай хүмүүс бусдыг шүүмжилдэг” хэмээн бас шүүмжилдэг. Шүүмжиллээ гэж шүүмжлэх нь сөргөлдөхийн эхлэл гэнэ. Шүүмж сайн зүйл үү, муу юу гэдэгт эрдэмтэд хариулахыг оролджээ. Харин сэтгэлзүйчид ямар ч хүн дотроо шүүмжлэлийг эсэргүүцдэг тул бусдыг шүүмжлэхгүй байхыг зөвлөдөг байна. Өөрөөр хэлбэл шүүмжлэлд дуртай хүн гэж байдаггүй аж. Тэгээд яах вэ?  Шүүмжлэх нь зөв үү, буруу  юу?  Тэгвэл  адерналин өндөртэй, сэргэг өөрөөр хэлбэл хөгжиж яваа, алдаагаа олж харж чаддаг ард түмэн шүүмжлэмтгий байдаг ажээ.
Шүүмжлэл нь  хүний хувьд алдаагаа олж харах боломж, ахиж дэвших хүч болдог. Хүн хэчнээн дотроо дургүй байсан ч алдаагаа засах чадвартай төрдөг. Мөн шүүмжлэл хүнийг хүлээцтэй, тэвчээртэй байдалд сургадаг байна. Тиймээс зөв шүүмжлэх соёлд суралцах, шүүмжлэлийг хүлээж авах ухамсартай байхыг зөвлөжээ.