Тариалалтын явц өнгөрсөн жилийн мөн үеэс 10 орчим хувиар доогуур байна хэмээн ХХААХҮЯ-наас мэдээллээ. Энэ сарын 8-наас хаврын тариалалт эхэлсэн. Энэ нь тариалангийн ихэнх бүс нутгаар хүйтэн сэрүүн, салхи ихтэй байсантай холбоотой бөгөөд тариалалт хэвийн эрчимтэй явагдаж байна.

Цаг агаарын төлөв байдалтай уялдан хаврын тариалалт бүс нутгуудад харилцан адилгүй эхэлж байна. Хангайн болон төвийн бүсэд тавдугаар сарын эхээр эхэлсэн бол бусад бүсэд тавдугаар сарын 12-ноос жигдэрчээ. Үр тарианы тариалалт 40.6 хувьтай, төмс 46.5 хувь, хүнсний ногоо 16.0 хувьтай байна.

Энэ онд улсын хэмжээнд 387 мянган га-д үр тариа, үүнээс 368 мянган га-д улаанбуудай, 32 мянган га-д малын тэжээл, 29 мянган га-д тосны ургамал, 13.8 мянган га-д төмс, 8.9 мянган га-д хүнсний ногоо,7.3 мянган га-д жимс, жимсгэнэ, нийтдээ 478 мянган га-д тариалах юм. Дээрх зорилтын хүрээнд үр тариа, тос, тэжээлийн таримлын тариалалтыг 14 аймгийн 1560 гаруй аж ахуйн нэгж, иргэн, төмс, хүнсний ногоо, жимс жимсгэнийн тариалалтыг 950 гаруй аж ахуйн нэгж, хоршоо болон 16 мянган өрх тариална.