Нийслэлийн гэр хорооллын өрхөд нэгдүгээр сарын 10-наас эхлэн угаар мэдрэгч суурилуулна гэдгийг албаныхан мэдэгдээд буй. Харин Стандарт, хэмжилзүйн газраас тус угаар мэдрэгчийн стандартыг батлаагүй байгаа талаар өчигдөр (2020.01.08) мэдээллээ. Стандарт хэмжилзүйн газрын Хэмжилзүйн газрын дарга Д.Дамбасүрэн “Угаар мэдрэгчийн стандарт боловсруулаагүйгээс цаг хугацаа алдаж байна хэмээх мэдээлэл тархаж байгааг залруулах зорилгоор мэдээлэл хийж байна. Мөн шинээр орж ирж буй угаар мэдрэгчийг туршиж, шалгалт тохируулга, баталгаажилтыг хийнэ.  Ингэхдээ лабораторийн орчинд тусгай камер байрлуулж, угаарын хийн янз бүрийн нэгдлүүдийг хэр мэдэрч байгаа зэргийг хэмжинэ. Гадна орчны агаарын бохирдлыг хэмждэг итгэмжлэгдсэн дөрвөн лаборатори бий. Харин угаарын хий мэдрэгч нь дотоод орчныг хянах юм. Энэ нь анх удаагаа манай улсад орж ирж байгаа учир тодорхой туршилтууд хийхээр ажлын хэсэг байгуулна. Төхөөрөмж нь ямар түвшнээр хэмжих, ямар стандарттай байх, өрх гэрт аль байрлалд суурилуулахад тохиромжтой вэ зэргийг ажлын хэсгийн дүгнэлтээр тодорхой болгоно. Хэрэв төхөөрөмжүүд ирээд манайд туршигдаж, стандартыг баталбал цаашид хүндрэл, асуудал үүсэхгүй" гэв. Нийслэлийн гэр хороололд суурилуулах гэж буй угаар мэдрэгч нь евро стандартын дагуу үйлдвэрлэгдсэн гэдгийг Стандарт хэмжилзүйн газарт ирүүлсэн орчуулгын материалаас дүгнэж байгаа аж. Тиймээс евро стандартын дагуу үйлдвэрлэгдсэн гэж үзээд хэрэглэхэд ямар нэгэн ноцтой аюул учрахгүй гэж найдаж байгаа. Тус угаар мэдрэгч төхөөрөмж нь 30 ppm болоход 120 минут, 50 ppm болоход 60 минутын турш түгшүүрийн дохио өгөх юм байна. Мөн 100 ppm болсон үед 10 минутын турш дохио өгдөг байхаар боловсруулагджээ. Энэ хэмжээний угаар нь хүний биед ямар хор учруулах вэ гэдэгт Стандарт хэмжилзүйн газрын мэргэжилтнүүд тодорхой хариулт өгч чадахгүй байна.