Д.СОЁМБО

 “Эрэл” группийн үүсгэн байгуулагчид болох Д.Эрдэнэбат, түүний эхнэр Д.Сэргэлэн нарыг гэрч, хохирогчдын мэдүүлэгт үндэслэн яллагдагчаар татах тогтоол гарсан байна. Д.Эрдэнэбат нь бусдыг “Ариг” банканд хөрөнгө оруулахад ятгаж, 20 гаруй тэрбум төгрөгийг өөрийн хувийн дансанд шилжүүлэн авсан бөгөөд үүнийгээ банкны дүрмийн санд оруулаагүй нь нотлогдсон гэнэ. Энэ нь бусдын эд хөрөнгийг залилан мэхлэх замаар луйвардаж авах гэсэн хуулийн зүйлчлэл бүхий эрүүгийн хэрэгт тооцогддог ажээ.

 Мөн үүнээс өмнө өнгөрөгч оны зургадугаар сард түүнийг Чингис бондын хөрөнгөөс “Хөгжлийн банк”-аар дамжуулан барьцаа хөрөнгөгүйгээр хоёр ч удаа зээл авсан гэдэг үндэслэлээр хэрэг бүртгэлийн хэрэг нээж, эрүүгийн цагдаагийн албаны эдийн засгийн гэмт хэрэгтэй тэмцэх газрын мөрдөн шалгах хэлтэст мөрдөн шалгах ажиллагаа явуулахаар болсон билээ. Гэвч энэ хэрэг хэрхэн шийдэгдсэн нь одоог хүртэл тодорхойгүй байгаа юм.

 Улмаар өнгөрөгч оны есдүгээр сард Эрүүгийн цагдаагийн газраас “Эрэл” группийн ерөнхий захирал Б.Эрдэнэбатад залилан, луйвар болон мөнгө угаалтын хэргээр эрүүгийн хэрэг үүсгэж, яллагдагчаар татах хүсэлтийг прокурорт гаргасан байна. Прокурор уг хүсэлтийг үндэслэлтэй гэж үзсэн тул Б.Эрдэнэбатад яллагдагчаар татах тогтоолыг танилцуулсан байдаг. Эх сурвалжийн мэдээлж буйгаар Б.Эрдэнэбат нь Хас, Хаан, Хөгжлийн банкуудад асар их хэмжээний өртэй байгаагаас барьцааны зарим хөрөнгийг хураах шүүхийн шийдвэр гараад байгаа юм байна. Мөн бусдаас хөрөнгө оруулалт нэрээр олон арван тэрбум төгрөг залилан мэхэлж авсан асуудлаар шалгагдаж байсан юм.