Өчигдөр болсон НИТХ-ын ээлжит хуралдаанаар АН-ын бүлэг ээлжит сюрпризээ барив. Тэд хотын дарга С.Амарсайханд зүг чигийг заагч луужин дурсгахаар бэлдсэн байна. Учир нь нийслэлийн удирдлагуудын аливаа шийдвэрүүд ямар ч тооцоо судалгаагүй, иргэдийнхээ саналыг аваагүйгээс нийслэлчүүдийг хохироож байна гэж тус бүлэг үзжээ. Иймд нийслэлийн Засаг даргын дараагийн шийдвэрүүд мэргэн байхыг бэлгэдэж, луужин дурсгахаар бэлдсэн юм байна.

 Баталснаа эргэж өөрчилдөг, барьснаа нураадаг, үндэслэлгүй шийддэг, сэтгэл хөөрлөөр асуудалд ханддаг, орон зай орчны баримжаагүй олон шийдвэрүүдийг тэд эрс шүүмжилжээ. Энэ талаарх дүгнэлтдээ “Энэ бүх эргэж буцсан шийдвэрүүдийн цаана нийслэлчүүдийн татварын орлогоор бүрдсэн төсвийн хөрөнгө уйлахгүй байна. Нийслэлийн удирдлага та бүхэн 2016 оноос хойш дөрвөн удаа нийслэлийн төсвийг баталлаа. Баталсан дөрвөн төсөвтөө найман удаа нэмэлт өөрчлөлт оруулж, нийт 12 удаа нийслэлийн төсвийг хэлэлцжээ.
Мөн орон нутгийн хөгжлийн сангийн хөрөнгө оруулалтын ажлын өөрчлөлтийг ч тоолохын аргагүй олон удаа хийсэн байдаг. Энэ хугацаанд хийсэн халаа сэлгээ, томилгоо, зөрчилд зориулсан хурал, хуйвалдааны тоо түүхэн дээд амжилт тогтоохоор олон боллоо. Харин нийслэлийн хөгжил, бүтээн байгуулалт, иргэдийн амьжиргаа сайжрахгүй байгааг иргэд хэлж байна” гэжээ.