БНХАУ-ын Хар Мөрөн мужид коронавирусээр халдварласан, 38 долоо хоногтой жирэмсэн эхийн биеийн байдал эрс муудаж, яаралтай хагалгаагаар хүүхдээ төрүүлжээ. 3.5 кг жинтэй төрсөн хүүхдийг эхээсээ мэндэлсэн даруйд нь тусгаарлаж, халдварласан эсэхийг тодруулахаар хоёр ч удаа шинжилгээ авчээ. Шинжилгээнийх нь хариу сөрөг буюу халдваргүй гарч, эмч нарт шинэ итгэл найдвар төрүүлээд байна.

Одоогоор эх, хүүхдийн биеийн байдал сайн, эмч нарын хяналтад байгаа гэнэ.

Түүнчлэн уншигч та бүхэнд коронавирусийн халдварын сүүлийн үеийн мэдээллээс сонирхуулъя.

Хубэй мужийн эрүүл мэндийн байгууллагын мэдэгдсэнээр даваа гарагт буюу хоёрдугаар сарын 03-нд коронавирусээр 64 хүн нас баржээ. Ингэснээр дэгдэлтийн голомтод нас барсан хүний тоо 426-д хүрсэн талаар БНХАУ-ын “CNN” сайт мэдээлэв.

Ташрамд дурдахад, Хубэй мужид шинээр 2345 сэжигтэй тохиолдол нэмж бүртгэгдэн, нийт өвчлөгсдийн тоо 13,522 болжээ. Харин коронавирусийн голомтонд 10,990 өвчтөн хэвтэн эмчлүүлж буйгаас 576 өвчтөний биеийн байдал хүнд байгаа бөгөөд коронавирусээр өвчлөгсдийн тоо дэлхийн хэмжээнд 19 мянгад хүрээд байна.