М.Содон-Эрдэнэ

 Үндэсний бүтээлээ дэмжиж, урамшуулж, тэр чиглэлээр уралдаан явуулна гэсэн Ерөнхий сайдын мэдэгдлийн гарчгийг нь уншаад алга ташигчид аа, тогтоод нэг анзаараарай. Яг хэрхэн, яаж дэмжих нь тодорхойгүй уриалга нь цаасан дээр үлдэж, салбарын бэрхшээл саадтайгаа хоцрох вий дээ. Цагаан сараар монгол контент хүргэ гэсэн сүртэй мэдэгдэл нийтэд ч таалагдана л даа. Гэхдээ агуулга сайтай уран бүтээл нь нэг далайлтаар хийгддэггүйг мэддэг нөхөр үү, үл мэдэх үү.
 Мэдрэмжтэй, сэтгэлтэй уран бүтээлчид минь тэгээд 14 хоногт багтааж судалгаа хийж, төлөвлөөд, нөгөөхөө хөгжүүлээд нэвтрүүлгээ гаргачих байх л даа. Тэгээд гарсан нэвтрүүлгийг нь бид үзээд соён гэгээрээд талархчихна аа бас. Үгүй мөн, дуулиантай хүн шүү. Эмзэг сэдэв нь үнэн. Үүнийг анхаарах учиртай нь ч маргаангүй. Дэргэдээ соёл урлагийн зөвлөл байгуулсан нь ч сайн байна.
Үнэхээр л Цагаан сараар монгол контент үзүүлье гэж бодсон юм бол жилийн өмнө энэ уралдаанаа зарлаж болохгүй байсан уу. Сонгуулийн жил болоод ч тэр үү, хэнд таалагдсан үг хэлэхээ бодож ядаж, “хямсганахдаа” бүхэл бүтэн салбарын эмзэг цэг дээр тоглолт хийх хэрэггүй.

 Ийм богино хугацаанд хүүхдэд зориулсан контент хийхийн тулд телевизийн дарга нар уран бүтээлчдэдээ үүрэг өгнө, тэд нь санаанд орсноо л нийлүүлнэ. Шууд л зураад гаргачих уу, зулгуйдаад даргад таалагдах уу?
 Хүүхэд ч тоож үзэхгүй юм гарах вий. Одоогийн хүүхдүүд гурав, дөрвөн хэмжээст дүрслэл, бодит мэт VR ярьж байгаа. Үзэж байгаа гадаад контент нь ч гэсэн тийм хэмжээнд хүрчихсэн. Сүүлийн хэдэн жил сэтгэл зүтгэлээрээ тэмүүлэн, хэд хэдэн баг брэнд болгох зорилготой монгол контент бүтээсэн. Эхнээсээ багачууд хүүхэлдэйг нь тэвэрч, дууг нь сонсч, номыг нь уншиж л сууна. Гэхдээ ийм хэмжээний төсөл 14 хоногт лав бүтээгүй. Судалгаа, тооцоотой дуугарахгүй бол сүүлд нь уран бүтээлчид чадваргүй нэр зүүгээд, дарга цацсан мөнгөн дүнгээ хэлж сүржигнээд, түмнийг загнах вий дээ.