БНХАУ-ын анагаахын судлаачид шинэ төрлийн коронавирусийн нууц үе таамаглаж байснаас 10 хоногоор удаан буюу 24 хоног байж болзошгүйг тогтоожээ. Тус судалгааг 2003 онд SARS коронавирусийг илрүүлж байсан доктор Жун Наншань тэргүүтэй эрдэмтэд хийсэн байна.

Үүнээс өмнө эрүүл мэндийн байгууллагууд MERS коронаврусд үндэслэн шинэ төрлийн коронавирусийн нууц үе дээд тал нь 14 хоног үргэлжлэнэ гэж анхааруулж байсан юм. Үүний дагуу халдварын эрсдэлтэй хүмүүсийг 14 хоног тусгаарлаж байсан билээ.

Судлаачид Хятадад байрлах 522 эмнэлгийн 1099 өвчтөний мэдээлэлд тулгуурлан энэхүү судалгааг гаргажээ.

Мөн тэдний тооцоолсноор халдвар авсан хүмүүсийн ердөө 1.18 хувь нь л зэрлэг амьтнаас халдварласан аж. Дийлэнх тохиолдолд халдварын голомт болох Ухань хотоос ирсэн хүмүүсээс халдвар тархсан байна.

Судалгаанд оролцогчдын 80 хувьд нь лимфопени бий болсон бөгөөд энэ нь хүний дархлааны эсийг бууруулж, ханиад томуу тусгахад хүргэдэг үйл явц аж. Ханиад томуугаар өвчлөөд эдгэсний дараа лимфопени өөрөө аажмаар намждаг байна. Гэвч коронавирусийн халдвар авч, лимфопени бий болсон 55 өвчтөнийг эрчимт эмчилгээний тасагт оруулан эмчилж байх үед 15 нь уушгины хатгалгаа өвчнөөр нас барсан юм.