Он гарсаар бидний цөөхөн монголчууд М.Билэгт гишүүний хэлсэнчлэн айдас хүйдэстэй амьдрах боллоо. Дайны хажуугаар дажин гэгчээр коронавирусийн дуулианыг далимдуулж нэр нь үл мэдэгдэх этгээд олон нийтийг айлгаж, сандаргах зорилго бүхий дуут шууданг цахим орчинд тарааснаас болж иргэд гурил будаа ихээр нөөцөлж, дэлгүүрийн лангууг хоосолж байна. Дээрх байдлаар худал мэдээлэл тараасан хүмүүсийг Зөрчлийн хуулиар хоёр сая төгрөгөөр торгох хуулийн зохицуулалт бий. Гэсэн ч өнөөдрийг хүртэл хэн нэгэнд ийм арга хэмжээ авсангүй. Бүр тодорхой нэр ус, албан тушаалтай эзэн холбогдогч нь тодорхой хэргийг хууль хяналтынхан тэгсхийгээд өнгөрүүлжээ. Тодруулбал, Гадаадын иргэн харьяатын газрын нэр бүхий ажилтан, “БНХАУ-ын 50 иргэнийг хууль бусаар хил нэвтрүүлж, Монголчуудыг коронавирусээр сүйрүүлнэ” хэмээн олон нийтийн газар ярьсан гэх мэдээлэл цацагдсан. Монгол Улсын Засгийн газар коронавирусийн тархалтаас урьдчилан сэргийлэх чиглэлээр өдөр шөнөгүй идэвхийлэн ажиллаж байхад Д.Мөрөн даргатай Гадаадын иргэн харьяатын газрын мэргэжилтэн ийм зүйл ярьсан нь тэр даруйдаа тусгай албаныхны сонорт хүрсэн юм.

 Энэ талаар ГИХГ-ын дарга Д.Мөрөнгөөс тодруулахад, “Тусгай албаныхан уг хэргийг шалгаад дуусч байгаа байх. Бид тийм ёс зүйгүй хүнийг ийм ажилд ажиллуулахгүй. Ажлаас нь чөлөөлсөн байгаа” гэсэн юм.
Уг албан тушаалтан цаанаа ямар нэг хорон санаа зорилготой байсан бол ажлаас халаад өнгөрнө гэдэг багадах хэрэг. Түүнд зөрчлийн хуулиар хариуцлага хүлээлгэх ёстой. Цаашлаад түүний хэлсэн үг үндэстний аюулгүй байдалд заналхийлж байгаа тул ҮАБЗ анхааралдаа авч, түүний ард хэн нэгэн зохион байгуулагч байгаа эсэхийг шалгаж, шат дараалсан арга хэмжээ авах нь зүйтэй юм. Гэтэл өнөөдөр тэр хүнийг ажлаас нь халаад өнгөрүүлжээ. Хууль сахиулах үүрэгтэй цагдаа, шүүх, прокурорын байгууллага ийм онцгой нөхцөлд энэ мэт асуудлыг жижиг зүйл мэтээр харж буй нь гэмт этгээдүүдийг өөгшүүлж буй явдал юм.
Ёс бус үйлдэл гаргаж, нийгмийг айдаст автуулсан тус ажилтан нь Буянт-Ухаа боомтод ажилладаг байсан бөгөөд Гадаадын иргэн харьяатын газарт 2016 оноос хойш алба хааж байжээ. Мөн тэрбээр согтуурсан үедээ, ажлын бус цагаар ийм алдаа гаргасандаа маш их гэмшиж байна гэжээ.

эх сурвалж : "Ардчилал таймс" сонин