Өнөөдөр Эрүүл мэндийн яамнаас ээлжит мэдээллээ хүргэлээ.

ХӨСҮТ-ийн захирал Д.Нямхүү "Хоёрдугаар сарын 12-нд Дорнод аймагт нэг, Баян-Өлгийд нэг, ХӨСҮТ-д хоёр хүн тусгаарлагдсан. Эдгээр хүмүүсийн шинжилгээний хариунууд сөрөг гарсан, шинэ коронавирусийн халдвар илрээгүй. 13-нд Бээжин-Улаанбаатарын онгоцоор ирсэн Хунань мужид сурдаг зургаан оюутан ирснийг тусгаарлаад, хянаж байгаа. 

Өнөөдрийн байдлаар ХӨСҮТ-д нийт найман хүн, Архангай аймагт нэг хүн тусгаарлагдан, хянагдаж байна. Шинжилгээний хариуг хүлээж байгаа. Ухань хотоос ирсэн 31 оюутныг давтан шинжилгээнд хамруулсан бөгөөд шинэ төрлийн коронавирусийн халдвар илрээгүй.

Ухань хотод байхдаа нэгдүгээр сарын 23-наас хоёрдугаар сарын 1-нийг хүртэл Хятад улсын эмч нарт хянагдаж байгаад ирсэн эдгээр оюутнууд хоёр удаагийн лабораторийн шинжилгээнд хамрагдсан мөн өдөр бүр эмчийн хяналтад байхад ямар нэг зовуурь илрээгүй тул маргааш эмнэлгээс гаргахаар шийдсэн" гэж хэллээ