Монгол Улсын Засгийн газраас "COVID-19" коронавирусийн халдварт өвчнөөс сэргийлэх зорилгоор “Гамшгаас хамгаалах өндөржүүлсэн бэлэн байдлын зэрэгт” хэсэгчлэн шилжүүлсэн. Энэхүү шийдвэрийн дагуу Үндэсний Статистикийн хорооноос энэ оны 2 дугаар сарын 17-ны өдөр хийх “Монгол Улсын эдийн засаг, нийгмийн байдал” статистикийн мэдээллийн хэвлэлийн бага хурлыг цахим хэлбэрээр хийлээ. 
Ажиллах хүчний судалгааны мэдээллээр Монгол Улсад 1.3 сая хүний ажиллах хүч байна. Оролцооны түвшин 60.7 хувь байгаа ба эрэгтэй 69 хувь, эмэгтэй нь 53.2 хувьтай гэв.

Нийт ажиллагсдын 623.9 мянга нь үйлчилгээ, 310 мянган ХАА-н салбарт, 254.5 мянга нь үйлдвэрлэлийн салбарт ажиллаж байна. 

Харин эрүүл мэндийн өвчлөлөөр авч үзэхэд усан суулгаар өвчлөгчид 38.5 хувиар, сүрьеэгээр өвчлөгчид 22.8 хувиар, салхин цэцгээр өвчлөгчид 13.9 хувиар буурсан үзүүлэлттэй гарсан бол 2020 оны нэгдүгээр сарын байдлаар бэлгийн замаар дамжих халдварын тохиолдол 1,900 болж, өмнөх оны мөн үеэс 39.5 хувиар нэмэгджээ. Мөн улаанбаатар хотод 2020 оны 1 дүгээр сард ХДХВ/ДОХ-ын 2 тохиолдол илэрч, улсын хэмжээнд бүртгэгдсэн ХДХВ/ДОХ-ын нийт тохиолдол 288 болсоныг Үндэсний статистикийн хорооноос мэдээлэв.