Гарын үсгээр нь тухайн хүний зан чанарыг тодорхойлох гэсэн оролдлогыг судлаачид хийдэг. Гаргацтай эсвэл таталж бичсэн, үзгээ чанга, сул дардгаас нь хамаарч, сэтгэлзүйн онцлогийг таамагласан тест түгээмэл бий. Тэгвэл энэ дугаараас эхлэн бид та бүхэнд олны танил эрхмүүдийн гарын үсгийг цувралаар танилцуулахаар боллоо.
 Анхны гарын үсэг “Богд”-ынх. Монголын уран сайхны зургаан кинонд Богд хааны дүрд тоглож, энэ дүрээрээ ард олондоо хүндлэгдсэн Ардын жүжигчин Нямын Цэгмид гуай ийнхүү монгол бичгээр гарын үсэг зурдаг байжээ. Тэрбээр 1910 онд төрж, 1924 оноос хойш театрын жүжигт тоглосон түүхтэй. 1994 онд хамгийн сүүлд У.Шекспирийн “Ричард ван” жүжигт Лондон хотын захирагчийн дүр бүтээсэн гээд бодохоор энэ эрхэм театрын тайзнаа 70 жил “амьдарчээ”. 50 гаруй жүжгийн туслах болон гол дүрд тоглож, 20 гаруй бүтээлийг Драмын театрын тайзнаа найруулан тавьсан энэ эрхэм Санхүүгийн сургуульд суралцаж, Засгийн газрын нягтлан хийж явсан хүн. Урлаг, уран сайханд дуртай болохоор удаа дараа хүсэлт гаргасан ч санхүүгийн мэргэжилтэн ховор байсан үед түүнийг амар шилжүүлсэнгүй. Харин 1932 онд Улсын төв театрын нягтлан болсноор түүнд дуртай ажлаа сэтгэл амар хийх боломж бүрджээ. “Сүхбаатар”, “Өглөө”, “Тэмцэл”, “Зэрэг нэмэхийн өмнө”, “Төгсгөл”, “Хатанбаатар” уран сайхны кино, “Талын баатар” жүжигт тэрбээр Богд хааны дүрд тоглож байсан.

 Хожим нь түүнтэй ажиллаж байсан хүмүүсээс төлөөлүүлсэн Лха.Долгор гуайтай уулзахад “Миний баясгалан” жүжгийн гол дүрд Л.Цогзолмаа, би эвлэлийн үүрийн даргад тоглосон. Тэгэхэд Н.Цэгмид гуай биднийг “Гурван том амтай хүүхэн зритель залгичих гээд л” гэж цаашлуулж байсан” хэмээн түүнийг дурссан удаатай. Алтан үеийн жүжигчин тэрбээр дэлгэцэнд мөнхөрсөн Богд хааны дүрээ гавьяат жүжигчин У.Батбаатар шавьдаа “Эцсийн шийд” жүжгээр өвлүүлсэн юм билээ.

эх сурвалж : "Ардчилал таймс" сонин