Шинэ коронавирусийн халдвараас урьдчилан сэргийлэх ажлын хүрээнд Азийн хөгжлийн банк (АХБ) 4.2 тэрбум төгрөгийн тоног төхөөрөмж нийлүүлэхээр болсон. Эхний тоног төхөөрөмжүүд өчигдөр (2020.02.19) ирж буй талаар АХБ-ны Монгол дахь Суурин төлөөлөгчийн газраас мэдээллээ. Шинэ коронавирусийн голомтын бүс болох БНХАУ-д гарсан дэгдэлтийн үеийн өвчлөлийн байдлаас үзэхэд тус вирусийн халдварын эмнэлзүйн шинж нь амьсгалын хурц дутмагшил, бөөрний дутагдалд хүргэж байгаа аж. Иймд АХБ-ны 4.2 тэрбум төгрөгийн санхүүжилтээр амьсгалын болон диализын аппарат захиалсан. Япон, Герман зэрэг АХБ-ны гишүүн орнуудаас ирж буй есөн нэр төрлийн тоног төхөөрөмжид богино хугацаанд оношлогч, явуулын рентген, хүүхдийн амьсгалын аппарат байна. Эдгээр тоног төхөөрөмж хоёрдугаар сарын 25 гэхэд бүрэн ирэх ажээ. АХБ манай улсын эрүүл мэндийн салбарт хоёр чиглэлээр анхааран ажиллах юм. Иймд дээрх тоног төхөөрөмжөөс гадна нэмэлтээр 1.6 орчим тэрбум ам.долларын төсөл хэрэгжүүлэхээр болжээ. Үүний нэг нь техникийн туслалцаа үзүүлэх буюу гаднаас мэргэжлийн өндөр түвшний шинжээч авчирч эмнэлгүүдийн бэлэн байдал болон эрсдэлийн үнэлгээ хийж, алдаа дутагдлыг залруулахад чиглэх бол нөгөө нь бэлэн байдлыг хангах холбогдох байгууллагуудын чадавхыг сайжруулна.