Улсын онцгой комисс өнөөдөр хуралдаж хоёрдугаар сарын 23-наас 27 хүртэл хот хоорондын зорчигч тээврийн хөдөлгөөнийг зогсоох шийдвэр гаргалаа. Үүнд нислэг хамаарахгүй. Харин автобус, галт тэрэг, автомашинаар Улаанбаатараас аймгууд хоорондын орох гарах хөдөлгөөнийг зогсоож байгаа аж.

Энэ талаар Улсын Онцгой комиссын дарга Ө.Энхтүвшин "БНХАУ-ын хаврын баярын үеэр 84 сая орчим хүн шилжилт хөдөлгөөн хийсэн нь тус улсын бүх муж болон бусад улсад тархан халдвар авсан тохиолдол 34 хувиар нэмэгдэх нөхцөл болсныг тогтоосон. 13 аймгийн онцгой комиссын даргаас цагаан сарын битүүний өдрөөс эхлэн шинийн гурван хүртэл Улаанбаатар болон эдгээр аймгаас орох, гарах хөдөлгөөнийг хаах санал ирүүлсэн. Уг асуудлыг хэлэлцэн хоёрдугаар сарын 23-ны 08:00 цагаас 27-ны өдрийг хүртэл хот, хоорондын зорчигч тээврийг зогсоохоор боллоо" гэж хэлсэн юм. 

Мөн ойрын өдрүүдэд ихэнх нутгаар цас орж, цасан шуурга шуурч хүйтэн байхыг Цаг уур орчны шинжилгээний газраас анхааруулсан. Тиймээс зам хаах шийдвэр гарсантай холбоотойгоор хулгайн замаар гарч энд тэнд цасанд суугаад өөрийгөө хамт яваа хүмүүсийнхээ амь насанд эрсдэл учруулахгүй байхыг  Онцгой байдлын ерөнхий газрын дарга Т.Бадрал онцгойлон анхаарууллаа.