Эрүүл мэндийн яам өнөөдөр ээлжит мэдээллээ хийлээ. Энэ үеэр ХӨСҮТ-ийн захирал Д.Нямхүү ажиглалт, тусгаарлалтад орсон хүмүүсийн талаарх мэдээллийг өгсөн юм.

Тэрбээр "Одоогоор Монгол Улсад коронавирусийн тохиолдол бүртгэгдээгүй. Хоёрдугаар сарын 28-нд ХӨСҮТ-д таван тохиолдол тусгаарлагдаж, лабораторийн үзлэг, тандалт судалгаа хийгдэж байна. Мөн хоёрдугаар сарын 28-нд 34 хүн, Асралт Мед эмнэлэгт 14 хүн, Сэлэнгэ аймагт дөрвөн хүн буюу нийт 52 хүн ажиглалтад ороод байна. Мөн Сонгдо эмнэлэгт сэжигтэй тохиолдол илэрсэн. Үүнд ХӨСҮТ-ийн мэргэжлийн баг очиж ажилласан. Толгой нь өвдөж, ханиалгах шинж тэмдэгтэй байна.

Бид бүхэн ядрахгүйгээр үүргээ биелүүлнэ. Хамгийн гол нь иргэд дэмжиж асуудал учруулахгүй байж, үүргээ биелүүлбэл бид ч гэсэн сэтгэл санаагаар тайван ажиллана. Ажиглалтад орж байгаа хүмүүсийн тоо нэмэгдэж ачаалал ихсэж байгаа учраас ажиглалтад авах газрууд хэрэг болж, нэмэгдэх шаардлагатай байгаа.

Мөн байрлаж буй эмнэлгийнхээ нөхцөлийг голж, эмч ажилтнуудад хүндрэл учруулж буй иргэд байна. Эмнэлгийн ажилтнуудын тусламж үйлчилгээнд хүндрэл учруулахгүй байхыг хүсэж байна" гэж хэллээ.