Эрүүл мэндийн яамнаас ээлжит мэдээллээ хийлээ. ХӨСҮТ-ийн захирал Д.Нямхүү "Гуравдугаар сарын 2-нд ХӨСҮТ-д хоёр, Налайх дүүрэгт нэг, нийт гурван сэжигтэй тохиолдлыг тусгаарлан, шинжилгээ хийж байна. Өчигдөр Сэлэнгэ аймагт нэг, Баянбаян сувилалд 78, Дархан-Уул аймагт 21, нийт 100 хүнийг ажиглалтад аваад байна" гэж хэллээ. 

Мөн 2020 оны гуравдугаар сарын 1-нд ХӨСҮТ-д тусгаарлагдсан хоёр, Сэлэнгэ аймагт тусгаарлагдсан гурав, нийт таван тохиолдлын шинжилгээний хариу сөрөг буюу халдваргүй гарсан байна. 

Халдвар гарсан улсуудаас ирж байгаа иргэдэд сүүлийн 14 хоногийн хугацаанд өвчний шинж тэмдэг илэрсэн бол сэжигтэй тохиолдол гэж үзэн тусгаарлах бөгөөд шинж тэмдэг илрээгүй бол тусгайлан бэлдсэн байранд ажиглалтад авч байгаа аж.

"БНСУ болон Япон улсаас Монгол руу явах гэж байгаа иргэдэд нисэх онгоцны буудал дээр түргэвчилсэн оношилгоо хийж өгөөч ээ гэсэн хүсэлт тавьсан. Хариу хүлээж байгаа" гэж ЭМЯ-ны эмнэлгийн тусламжийн газрын дарга Я.Буянжаргал хэллээ.

 ДЭМБ-ын Зөвлөх баг гуравдугаар сарын 2-ноос эхлэн эрчимт эмчилгээ, халдварын үед авах арга хэмжээний чиглэлээр Монголд ажиллаж байна бөгөөд өвчлөл гэр бүл, хамт олны хүрээнд халдвар тархаж байгааг ЭМЯ-ны газрын дарга Д.Нарангэрэл онцолсон юм. 

 Гуравдугаар сарын 3-ны өглөөний 9 цагийн байдлаар дэлхийн 76 оронд нийт 90,931 тохиолдол бүртгэгдэж, 3125 хүн нас барсан байна. 38 улс халдварын 10-аас доош тохиолдолтой, 19 улс нэг тохиолдлыг мэдээлсэн. 130 улсад коронавирусийн халдвар бүртгэгдээгүй байна.