Эрүүл мэндийн яанаас мэдээлэл хийх үеэр тусгаарлагдсан иргэд Цагдаагийн алба хаагчдын шаардлагыг биелүүлэхгүй байгаа талаар ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан мэдээлэл өглөө.

 Тэрээр хэлэхдээ "Монгол улсын иргэн Ш, А гэх хоёр хүн бага насны хүүхэдтэйгээ Итали улсаас ирсний дараа асуумж авахад хаагуур явсан талаараа худал мэдүүлсэн нь тогтоогдсон. Мөн тусгаарлалтад байгаа иргэд зөрчил гаргаж байна. Жишээлбэл, Хөвсгөл аймгийн харьяат, сувилагч эмэгтэй бусдыгаа "Эндээс гаръя" хэмээн турхирч, эмнэлэгт жагсаал маягийн юм хийхээр оролдсон. Мөн ХӨСҮТ-д тусгаарлагдсан иргэдээс гарч, орох талаар асуудал үүсгэсэн. Налайхын харьяат хүн онгоцноос буунгуутаа зугтаах оролдлого хийсэн. Зарим нь өөр газар тусгаарлагдана гэж эрүүл мэндийн байгууллагын үйл ажиллагааг эсэргүүцсэн. Мөн Улсын хоёрдугаар эмнэлэгт байгаа нэг иргэн ачаа тээшиндээ авч орж ирсэн согтууруулах ундаа уун,  өөр саванд хийж бусдад өгөх гэж оролдон тусгаарласан өрөөнүүдийн хаалгыг татсан гэх мэт зөрчил бүртгэгдээд байна. Монгол Улс хэдий эрх чөлөөт улс ч гэсэн  хүний амь нас, эрүүл мэнд илүү чухал учир өөрийн болон бусдын амь насыг хамгаалж, улсаас тавьж буй онцгой шаардлагуудыг иргэн бүр биелүүлэх ёстой.

 Зөрчил гаргаж буй иргэд үйлдлээ таслан зогсоохгүй гэвэл олон нийтэд ил тод мэдээлнэ. Энэ үүргээ биелүүлээгүй хэн ч байсан зөрчлийн болон эрүүгийн хариуцлага тооцно. Бид тухай бүрт нь баримтжуулж байгаа ба тодорхой хугацааны дараа дэглэм дууссан хойно бүгдэнд нь хуулийн хатуу хариуцлага тооцох болно. Тиймээс зөрчил гаргахгүй байхыг онцгойлон хүсье" гэлээ.