БСШУС-ын сайд Ё.Баатарбилэг энэ жилийн Элсэлтийн ерөнхий шалгалтын талаарх мэдээллийг өглөө. 

Тэрээр хэлэхдээ "ЭЕШ зурагдугаар сарын 8-11-нд улс орон даяар явагдана. Өнгөрсөн жилүүдэд сонгож үзэх болон заавал үзэх судлагдахуун гэсэн 3-4 хичээл байсан бол энэ жил зөвхөн заавал үзэх судлагдахуунаар авах болно.  Сурагчид багш нартайгаа уулзан шалгалтад бэлдэх боломж хомс байгаа учир ийнхүү шийдвэрлэлээ. Босго оноо 400 хэвээр байх болно.

Харин монгол хэлний шалгалтыг дөрөвдүгээр сарын 25-нд авна. Хэрэв шалгуулагч уг шалгалтад амжилтгүй оролцох, тодорхой шалтгаанаар оролцож чадаагүй хүүхэд тавдугаар сарын 16-нд өгөх боломжтой. Монгол хэлний босго оноо 400-г давж байж ЭЕШ өгөх боломжтой болно. 

Улсын хэмжээнд цахимаар бүгдийг нь хянадаг. Хүүхдүүд шалгалт өгөх байранд цугларч нэгдсэн байдлаар оролцоно. Өнгөрсөн жил 18 мянган шалгуулагчид хамрагдсан ЭЕШ-ыг нэг цаг хугацаанд цахимаар явуулсан нь элдэв хэл ам дагуулалгүй маш амжилттай болсон гэж үзэж байна. Энэ жил 28 мянга орчим хүүхэд шалгалт өгнө. Хорио цээрийн дэглэм үргэлжилсээр байвал харин шалгалтын энэ байдлыг үргэлжлүүлэх боломжгүй. Гэхдээ бид энэ сарын 30-нд хорио цээрийн хугацаа дуусч хичээл сургуулийн үйл ажиллагаа хэвийн явагдах байх хэмээн найдаж байна. Эс тэгвэл багагүй хүндрэлүүд гарах гээд байна” гэлээ.