Т.ЭРДМАА 

 Нийслэлд ангилсан хог хаягдал тээвэрлэх машин явж эхэллээ. Нийслэлийн ИТХ-ын төлөөлөгч Ц.Баатархүү өчигдөр (2020.03.05) ангилсан хог хаягдлыг тээвэрлэх хоёр автомашин Чингэлтэй дүүргийн тохижилт үйлчилгээний компанид хүлээлгэн өглөө. Улаанбаатар хотын Ерөнхий боловсролын сургуулиуд болон зарим аж ахуйн нэгжүүд хог хаягдлаа ангилан ялгах хогийн савыг ашиглаж, хэвшсэн байна. Гэвч тэдгээр ангилсан хогийг тээвэрлэдэг автомашин байхгүй учир ачихдаа нийлүүлчихдэг байжээ. Ангилсан хогийг тусад нь ачдаг болсноор дахин боловсруулах үйлдвэрүүдэд шууд хүргэх боломжтой болж байна. Хог хаягдлаа баялаг болгож хэвших, хоггүй болох зорилготой ажлуудыг НИТХ-ын төлөөлөгч Ц.Баатархүү санаачлан, өмнө нь хуванцар сав, лааз, цаасан хайрцгийг хийж, цахим мөнгө авч болдог RVM цэгийг нэвтрүүлсэн. Энэ удаа дахин боловсруулах хогийн тээврийн тогтолцоог Улаанбаатар хотод нэвтрүүлж байна.
Ц.Баатархүү “Хүмүүс хогоо анхан шатанд ангилж ялгасан ч түүнийг тээвэрлэдэг тогтолцоо байхгүй. Иймд Чингэлтэй дүүрэгт Орон нутгийн хөгжлийн сангийн хөрөнгөөр ангилсан хог хаягдал тээвэрлэх тусгай автомашинууд хүлээлгэн өгч байна. Улаанбаатар хотод хог тээврийн 306 машин явдаг. Жилд нэг сая гаруй тонн хог гардаг. Үүний 50-60 хувийг нь дахин боловсруулах боломжтой байдаг. Тэгэхээр энэ тээврийн тогтолцоонд 100 гаруй автомашин шаардлагатай байгаа” хэмээв.

эх сурвалж :"Ардчилал таймс сонин"