Өнөөдөр /2020.03.09/ Монгол Улсын иргэн В.Урантуяа, М.Янжиндулам нар хэвлэлийн бага хурал хийлээ.

Сэлэнгэ аймгийн оршин суугч В.Урантуяа “2019 оны хоёрдугаар сарын 12-нд  би хоёр ихэр хүүтэй болсон. Тэдний маань нэг Т.Билэгт ховдол хоорондын цоорхой тэргүүтэй дөрвөн төрлийн зүрхний гажиг гэдэг оноштой. Одоогийн байдлаар ЭХЭМҮТ-д биеийн байдал маш хүнд, хэвтэн эмчлүүлж байна. Бид “Энержи Ресурс” хандивын компанийн сонгон шалгаруулалтад тэнцэж, БНХАУ-ын Хөх хотод яаралтай хагалгаанд орохоор төлөвлөсөн байсан. Гэсэн ч хөдөлгөөн хязгаарласан тул хоёрдугаар сарын 4-нд товлогдсон хагалгаандаа орж чадаагүй. Одоо Турк, Энэтхэг орнууд руу зорчин, эмчлүүлэх боломжтой ч 60-70 сая төгрөг шаардлагатай болоод байна. Бидний амьдрал ахуй энэ мөнгийг гаргахад хүрэлцэхгүй байгаа тул Монголын ард түмнээсээ тусламж хүсэж байна” гэсэн юм.

Түүний дараа Дархан-Уул аймгийн оршин суугч М.Янжиндулам “Миний охин М.Аззаяа 10 сартай. Зүрхний томрол, гол судасны нарийсал гэх мэт хавсарсан олон оноштойгоор ЭХЭМҮТ-д хэвтэн эмчлүүлж байгаа. Улсын төв гуравдугаар эмнэлэгт хагалгаанд орох байсан ч эмч нар нь хил хаагдахаас өмнө БНХАУ-аас ирж амжаагүй. Иймд мөн хагалгаанд орж чадаагүй. Энэтхэг, Турк улсад эмчлүүлэх боломжтой ч зардал мөнгөний асуудал нь бидний амьдралд хүнд тусаж байна. Тиймээс ямар гарц гаргалгаа байж болохыг хэлж, зөвлөөч гэж ард түмнээсээ хүсэж байна” хэмээсэн юм.

Тэдний хувьд уг асуудлаар эмч мэргэжилтнүүд болон Эрүүл мэндийн яамны ажилчидтай уулзаж, ярилцсан байна. Хариуд, “Вирусийн халдвар намжиж, хил нээгдсэний дараа явж эмчлүүл” гэх утгатай зүйлийг хэлжээ. Хүүхдүүдийн бие асар хүнд, морфин тарианд орсон байгаа гэдгийг ээж нар онцолж байсан юм.