Эрүүл мэндийн яамнаас Коронавирустай холбоотойгоор ээлжит мэдээллээ хийсэн билээ.  Энэ үеэр ДЭМБ-ын ажилтан О.Ариунтуяа “ДЭМБ-ын гуравдугаар сарын 9-ний мэдээллээр дэлхийн 109 улсад COVID-19 халдварын нийт 100,577 тохиолдол бүртгэгдсэн байна. Өнгөрсөн нэг хоногийн хугацаанд дэлхийн хэмжээнд 98 хүн нас барж, нийт нас баралтын тоо 3,584 боллоо. Харин БНХАУ-д нас баралт 23-аар нэмэгдэж, 45 тохиолдол шинээр бүртгэгдсэн.

Иран, Испани, Итали зэрэг орноос импортлогдсон тохиолдол БНХАУ-д бүртгэгдээд байна. Тус улсад 80 мянга гаруй тохиолдол бүртгэгдсэнээс 70 хувь нь эдгэрч эмнэлгээс гарсан. Иранд 743 тохиолдол шинээр бүртгэгдсэн бол Италид нийт тохиолдлын тоо 1,492 болж, нас барсан хүний тоо 463-т хүрлээ. Хөл хориог өчигдрөөс орон даяар тогтоох шийдвэр гарч 60 сая хүн хамрагдсан байна" гэж хэллээ.