Засгийн газрын хуралдаанаас гаргасан шийдвэрийн талаар Зам, тээврийн хөгжлийн сайд Б.Энх-Амгалан мэдээлэл хийлээ. Тэрээр "Засгийн газрын өнөөдрийн хуралдаанаар хоёр асуудлыг шийдвэрлэлээ. Энэ нь хотын түгжрэлийн бууруулахад чиглэсэн ажлууд юм. Үүнд 6-12 метрийн өндөрт, нийтдээ 13 км-ийн урттай хоёр урсгалтай, дөрвөн эгнээтэй хоёр түвшний замын байгууламжийг барина. Ингэснээр түгжрэл 46.5 хувь буурч, агаарын бохирдлыг 20 хувь багасна гэж тооцоолж байна. Төслийн нийт хөрөнгө оруулалт 800 сая ам.доллар. Энэ зам бол хоёрдугаар түвшний зам. Тиймээс төлбөртэй. Нэг тээврийн хэрэгслээс 1 ам.доллар хураах бөгөөд зургаан жилийн дотор зээл болон зээлийн хүүг нөхнө гэж үзэж байна. Энэ зам нь сансрын аюулгүйн тойргоос зүүн дөрвөн зам, урагшаагаа нарантуул, дүнжингарав, үндэсний цэцэрлэгт хүрээлэн, Хан-уул дүүрэг, нарны гүүрээсээ дөрвөн зам, гэсэр сүм 100 айл гээд бүтэн тойрог явна. Замыг барихын тулд орон нутгийн төсвөөс мөнгө гаргахгүй бөгөөд концессын гэрээгээр 25 жилийн хугацаатай хийгдэж байгаа төсөл" гэж хэллээ. 

Мөн тэрээр хоёрт дүүжин тээврийн хэрэгсэл хийнэ гэдгийг хэлсэн юм . Энэ нь нийтдээ 60,7 сая еврогийн өртөгтэй. Зээлийн хэлэлцээр нь 40 жилийн хугацаатай жилийн дунджаар 1 хувийн хүүтэй. Замын маршрут нь баянхошуу, ханын материал, 3,4-р хороололын эцэс хүртэл нийтдээ 4,9 км урттай аж.