Эрүүл мэндийн яамнаас коронавирүсийн асуудлаар ээлжит мэдээллээ өнөөдөр өглөө. Мэдээллийн үеэр Эрүүл мэндийн яамны Эмнэлгийн тусламжийн газрын дарга Я.Буянжаргал  “Өнөөдөр 09:30 цагт Франц иргэнийг ХӨСҮТ-д авчирсан. Тээвэрлэлтийн явцад хүндрэл гараагүй. Франц иргэний биеийн байдал хүндэвтэр байна. Гэхдээ амин үзүүлэлтүүд нь тогтвортой байна. Эмч нарын баг зөвлөлдөж, Францын иргэнийг нийслэлд авчрах нь зөв гэж үзсэн. Мөн бид Ухань хотын эмч нартай онлайн уулазлт хийж, эмчилгээний аргазүйн талаар ярилцахаар бэлтгэж байна” гэж хэллээ.

Мөн ХӨСҮТ-ийн захирал Д.Нямхүү “Гуравдугаар сарын 9-нд тусгаарлагдсан нэг хүний шинжилгээний хариу сөрөг гарлаа. Францын иргэний нэгдүгээр хавьтагч 98 хүнийг гуравдугаар сарын 10-нд тусгаарлаж лабораторийн шинжилгээ хийж байна. Эхний 23 хүний шинжилгээний хариу гарсан, халдвар илрээгүй. Францын иргэний биеийн байдал одоогоор хүндэвтэр байна. Биднийг дэлхий нийт харж байгаа. Тиймээс эрүүл мэндийн байгууллага үүргийнхээ дагуу бүхий л боломжоо дайчлан эмчлэх болно. 

Үүний дараа ДЭМБ-ын мэргэжилтэн О.Ариунтуяа Дэлхийн эрүүл мэндийн байгууллагын мэдээллийг хүргэлээ. Тэрээр "Турк, Монгол, Ямайка, Бруней зэрэг дэлхийн 14 оронд халдвар өнгөрсөн хоногт шинээр бүртгэгдлээ. БНСУ-д халдвар буурах хандлагатай бөгөөд өнгөрсөн хоногт 130 тохиолдол бүртгэгдсэн байна. Харин Италид өчигдөр орон даяар хөл хорио тогтоох шийдвэр гаргажээ. ДЭМБ-аас цар тахлын эрсдэл бодит аюул болж байгааг анхаарууллаа. Гэхдээ халдварыг тогтоон барих боломжтой нь харагдаж байна" гэлээ.