Өнөөдөр Эрүүл мэндийн яаманд шинэ төрлийн коронавирусийн талаарх цаг үеийн асуудлаар мэдээлэл хийх үеэр Хүний гавъяат эмч, “Мамба дацан” хийдийн тэргүүн хамба лам Д.Нацагдорж олон нийтэд сэтгэл санаагаа тайван байлгахыг зөвлөлөө.

 Тэрээр “Төр засаг, Эрүүл мэндийн яамтай хамтарч Монголын уламжлалт анагаах ухааны эмнэлгийн тусламж үйлчилгээг энэ өвчний үед авч хэрэгжүүлэх талаар заавар зөвлөгөө гарган ажиллаж байна. Цаашид уламжлалт анагаах ухааны зөвлөх багийг бүрдүүлж хамтран ажиллана. Өвчин хаанаас ч, хэнээс ч дамжиж орж ирэх бололцоотой. Тиймээс эв түнжинтэй, бие сэтгэлээ амар амгалан байлгаваас сайн сайханд хүрнэ. Бид өмнө нь H1N1 вирусийн үед ХӨСҮТ-тэй хамтран ажиллаж байсан. Энэ удаад ч мөн хамтран ажиллана. Ялангуяа хаврын цаг ирж буй энэ үед бие, сэтгэл хямрахын хэрээр ердийн өвчин ч тусах магадлал өндөр байдаг. Тиймээс эрүүл мэндээ хамгаалахад тайван байдал маш тус дэмтэй. Бие, сэтгэл хэдий чинээ амар амгалан байна, төдий чинээ сайн зүйл авчирдаг нь ертөнцийн жам. Тиймээс ухаант монголчууд минь хэл, сэтгэлээ ариун байлгаж, төр засагтайгаа хамтарч ажиллахыг хүсэж байна. Бидний эвтэй байх явдал олон хүнд тус болно гэж бодож байна” гэсэн юм.