Өнөөдөр НМХГ, НОБГ-аас мэдээлэл хийсэн билээ.

Нийслэлийн мэргэжлийн хяналтын газрын дэд дарга С.Даваасүрэн “ Сүүлийн үед агаарын температур өөрчлөгдөж байгаатай холбоотойгоор айл өрхүүд зуух, яндангийнхаа аюулгүй байдлыг нягтлах хэрэгтэй. Сүүлийн үед угаартсан гэх дуудлага нэмэгдэж байна. Өнгөрсөн хугацаанд 12 өрхийн 35 хүн угаарын хийн хордлогод өртсөн.

Мөн гуравдугаар сарын 10-ны өдөр нэг айл угаар мэдрэгчээ салгаж, тавьснаас болж угаарын хийнд хордсон тохиолдол гарсан. Сүүлийн үед угаар мэдрэгчээ унтрааж орхисон тохиолдлууд их байгаа бөгөөд үүнээс болж хүний амь эрсэдсэн тохиолдол ч гарсан.

Тиймээс иргэддээ угаар мэдрэгчээ битгий унтраагаач гэж хэлмээр байна. Хаврын улиралд салхи шуурга нэмэгдээд ирэхээр угаарын хийн хордлогын дуудлага нэмэгдэж болзошгүй хандлага ажиглагдаж байна" гэж хэллээ. 

Мөн Шинэ коронавирусийн дэгдэлтээс урьдчилан сэргийлэх зорилгоор товчоодод албаны хүмүүс байнга хяналт шалгалт, үзлэг хийж байгаа. Энэ үзлэг, хяналт шалгалтын хажуугаар иргэд түүхий нүүрс хот руу тээвэрлэж оруулж ирэхийг завдсан тохиолдол гарсан гэдгийг НМХГ-ын дэд дарга С.Даваасүрэн хэлсэн юм.