Эрүүл мэндийн яамнаас ээлжит мэдээллээ хүргэлээ. Үүнд ХӨСҮТ-ийн захирал Д.Нямхүү оролцож COVID-19 халдварын шинжилгээний хариунууд талаарх мэдээллийг танилцууллаа.

Тэрээр "Францын иргэний ойрын харьцагч болсон 58 хүний шинжилгээнд коронавирус илрээгүй. Энэ дотор франц иргэнтэй ойр байсан есөн хүний шинжилгээний хариу багтаж байгаа бөгөөд нэлээн ойрхон байсан хүмүүсийн хариу бүгд сөрөг гарсан гэдгийг хэлмээр байна. Өнөөдөр Дорноговь аймгийн кэмпээс нэмж сорьцууд ирнэ. Энэ ямар учиртай вэ гэхээр тэнд тусгаарласан хүмүүсээс тодорхой хэдэн хоногийн дараа шинжилгээ авъя гэж бид зөвлөлдсөн. Тийм учраас өнөөдөр сорьцууд ирнэ. Тэдний хариу маш чухал.

Гуравдугаар сарын 11-нд ХӨСҮТ-д тусгаарлагдсан найман хүний шинжилгээнд коронавирус илрээгүй.

Франц иргэний хавьтал болон бусад үйл ажиллагаа тусдаа явж байгааг тусад нь мэдээлж байна. Энэ өдөр нийт 25 хүнийг ажиглалтад аваад хянаж байгаа. Хяналтад байгаа хүмүүсээс шинжилгээ аваагүй ч гэсэн шинж тэмдэг илэрч байгаа эсэхэд байнга хяналт тавьж байна. Гэрээрээ байгаа хүмүүс ямар нэгэн шинж тэмдэг илэрвэл эмчид яаралтай мэдэгдээрэй гэдэг зөвлөмжийг өгч байна. Харин 12-нд ХӨСҮТ-д нэг сэжигтэй тохиолдлыг тусгаарлан шинжилгээ хийж байна” хэмээн хэллээ.