М.Хүслэн

 Шинэ төрлийн коронавирус COVID-19-ийн тархалт дэлхий даяар цар тахлын хэмжээнд хүрсэн нь спортын ертөнцөд ноцтой заналхийлж эхлээд байна. Ирэх зун Японы нийслэл Токио хотод болох зуны олимпын наадам товлосон хугацаандаа зохиогдох эсэх нь эргэлзээтэй боллоо. Түүнчлэн дэлхий даяар маш олон спортын уралдаан тэмцээнүүдийг цуцалж буй. Олон улсын жүдо бөхийн холбооноос цуврал гран-при тэмцээнүүдээ цуцалсан билээ. Тэгвэл өчигдөр Хойд Америкийн сагсан бөмбөгийн NBA лиг 2019/2020 оны улирлаа завсарлуулснаа албан ёсоор зарлалаа.
COVID-19-ийн тархалт спор­тын ертөнцөд хэрхэн нөлөөлж байгааг тоймлон хүргэж байна.

Мори Ёширо: Токиогийн олимпыг хойшлуулах ямар ч яриа байхгүй

“Токио 2020” олимпын наадмын зохион байгуулах хорооны гишүүн Харүюки Такахаши “Wall Street Journal”-д ярилцлага өгөхдөө “Токиогийн олимпыг цуцлах боломжгүй. Хэрэв цуцалбал ОУОХ-нд олон асуудал үүснэ. Наадмыг шууд дамжуулах гэж АНУ-ын телевизийн компаниуд маш их мөнгө төлсөн байгаа. Харин хоёр жил хойшлуулаад Бээжингийн өвлийн олимпын дараа хийж болох юм” гэж хэлсэн нь олимп зохион байгуулах Япон оронд шуугиан тарилаа. Тус олимпын наадмын зохион байгуулах хорооны дарга, Японы Ерөнхий сайд асан Мори Ёширо энэ талаар “Бид аюул осолгүй олимпын наадам зохион байгуулахаар ажиллаж байна. Болох ёстой хугацаанд нь хийх болно. Харүюки Такахашигийн хэлсэн үгийг сонсоод их гайхлаа. Түүнд сануулга өгсөн. Тэр ч уучлалт гуйсан” гэж сэтгүүлчдэд мэдээллээ.
Мөн Японы Олимп, парлимпийн асуудал хариуцсан сайд Сэйко Хашимото “Олимпын наадмыг цуцлах, хойшлуулах талаар ямар ч яриа байж болохгүй. Тамирчид дөрвөн жилд нэг удаа болдог олимпын наадамдаа ид бэлтгэж байна. Тэднийг ч гэсэн бодох ёстой” гэж мэдэгдэл хийлээ.
“Токио 2020” зуны олимп долдугаар сарын 24-нөөс наймдугаар сарын 9-ний хооронд явагдана.

NBA-гийн улирал завсарлалаа

Хойд Америкийн сагсан бөмбөгийн NBA лиг 2019/2020 оны улирлаа завсарлуулснаа албан ёсоор зарлалаа. “Юта Жазз” багийн төвийн тоглогч Рүди Гобер коронавирусийн халдвар авсан нь тогтоогдсоны дараа ийм шийдвэр гаргажээ.
“Юта Жазз”-ын хоёр дахь тоглогчоос мөн коронавирусийн халдвар илрээд буй. NBA-н “Юта Жазз” багийн хамгаалан тоглогч Эммануэль Мудиайгаас коронавирус илэрсэн байна. Тэрбээр коронавирус илэрсэн багийн анд Руди Гобертой ойр байж, хамт бэлтгэлд оролцсон болох нь тогтоогдож шинжилгээнд хамрагдахад ийнхүү халдвар илэрчээ. Одоогоор түүний биеийн байдал харьцангуй тогтвортой байгаа тухай “Clutch Points” цахим хуудаст мэдээлжээ.
Өчигдөр өглөө болох байсан “Юта Жазз”, “Оклахома Сити Тандер” багийн тоглолтод дээрх хоёр тоглогч оролцохгүй гэдгийг мэдэгдэж байсан.
“Юта Жазз” багийн тоглогч Руди Гобер болон Эммануэль Мудиай нараас коронавирус илэрсний дараа NBA-н удирдлага нийт таван багийн бүх тамирчныг тусгаарлахаар шийдвэрлэжээ. Учир нь сүүлийн 10 хоногийн хугацаанд “Юта Жазз” багтай таарч тоглосон тамирчид ч эрсдэлд орж байгаа тул ийм шийдвэр гаргасан байна. Ингэснээр “Кливленд Кавальерс”, “Нью-Йорк Никс”, “Бостон Селтикс”, “Детройт Пистонс”, “Торонто Репторс” багийн тоглогчид тусгаарлагдахаар болжээ. Харин NBA-д бүртгэлтэй бүх багийн тамирчин, арын алба, удирдлагуудаас коронавирусийн шинжилгээ авахаар болсон байна.
Одоогоор улирлын тоглолтыг бүр мөсөн цуцлах эсвэл таван сард шууд плей-оффын тоглолтыг эхлүүлэх зэргийг эцэслэн шийдээгүй байгаа. Өнөөдөр албан ёсоор тодорхой болно. 2019-2020 оны улирлын тоглолтууд дуусахад дунджаар 20 тоглолт үлдээд байсан билээ.

Уран гулгалтын ДАШТ-ийг цуцаллаа

“Канадын Монреаль хотод энэ сарын 18-22-нд явагдах байсан уран гулгалтын ДАШТ коронавирусийн халдварын улмаас цуцлагдлаа” гэж Квебек мужийн Эрүүл мэндийн сайд Даниэль Маккенн хэвлэлийн бага хурал дээр мэдэгдлээ. Тэмцээнд оролцохоор 30 орны 183 тамирчин бэлтгэлээ базааж, зарим нь Канадад очоод байсан билээ.
Коронавирусийн халдварын тохиолдол Квебек мужид долоо, Монреальд нэг гараад байгаа. Олон улсын холбооноос энэ жилийн дэлхийн аваргын тэмцээнийг цуцлах, эсвэл оны сүүлээр зохион байгуулж магадгүй гэж мэдэгдэв.
Уран гулгалтын ДАШТ 1896 оноос хойш зохион байгуулагдаж байгаа. Дэлхийн I, II дайны улмаас 14 тэмцээн явагдаагүй бол 1961 онд АНУ-ын шигшээ баг онгоцны ослоор сүйрсний дараа нэг удаа цуцлагдаж байжээ.

Чөлөөт, сонгомол бөхийн олимпын эрхийн тэмцээн хойшлогдлоо

Дэлхийн бөхийн нэгдсэн холбооноос Токиогийн олимпын эрхийн тэмцээн хойшлогдсоныг мэдээллээ. Европ тивийн эрхийн тэмцээн энэ сарын 19-22-нд Унгарын Будапештэд, дэлхийн тэмцээн дөрөвдүгээр сарын 30-наас тавдугаар сарын 3-нд Болгарын Софид явагдах ёстой байлаа. Хэзээ явагдах нь тодорхой болоогүй байгаа ч ДБНХ-ноос Европын тэмцээнийг тавдугаар сарын дундуур, дэлхийн тэмцээнийг зургадугаар сарын эхээр зохион байгуулах төлөвлөгөөтэй байгаа гэнэ.
ДБНХ-ны тэргүүн Ненад Лалович “Олимпын бүх эрхийг сонгон шалгаруулах тэмцээнээр олгоно. Гэхдээ одоо дэлхийн хэмжээний цар тахал гарсан үед бид тэвчээртэй, болгоомжтой байх ёстой. Тамирчдын эрүүл мэнд, аюулгүй байдал нэн түрүүнд байх болно” гэж мэдэгдсэн байна.
Энэ сард болох байсан Ази тив болон Африк, Номхон далайн орнуудын олимпын эрхийн тэмцээн мөн хойшлогдоод байгаа. Харин өнөөдөр Канадын Оттавад эхлэх Панамерикийн олимпын эрхийн тэмцээн хуваарь ёсоор явагдах шинжтэй. Токиогийн олимпод сонгомол барилдаан, эрэгтэй, эмэгтэй чөлөөт бөхийн төрлөөр жин тус бүрт 16 бөх оролцоно. Нур-Султанд болсон ДАШТ-д жин болгоны зургаан тамирчинд олимпын эрхийг олгосон. Үлдсэн арван эрхийг тив, дэлхийн эрхийн тэмцээнээс өгөх ёстой аж.

Роналду тусгаарлагдав

Италийн “Ювентус” багийн хамгаалагч Даниэле Ругани коронавирусийн халдвар авсан нь тогтоогдсон нь хөлбөмбөгийн ертөнцийг донсолголоо. Даниэле Ругани халдвар авсан нь тогтоогдсоноор түүний багийг тусгаарлан шалгаж эхэлсэн байна.Мөн тус багтай өнгөрсөн амралтын өдөр тоглосон “Интер” багийнхныг ч мөн адил шалгахаар болжээ. Ругани тэр тоглолтод оролцоогүй, сэлгээний суудалд сууж байсан ч багийнхантайгаа ялалтын баяраа хамт тэмдэглэсэн байна. “Ювентус” тусгаарлалтад орсноор энэ сарын 17-нд болох Аваргуудын лигийн “Лион”-той хийх тоглолт хойшлогдлоо.
Дэлхийн шилдэг хөлбөмбөгчдийн нэг, португал довтлогч Роналду “Ювентус” багт тоглодог. Криштиану Роналду лигийн ээлжит тойргийн тоглолтын дараа эгчийнхээ төрсөн өдрийг тэмдэглэхээр Португалд хариад байжээ. Португалын Засгийн газраас Итали явах бүх нислэгийг цуцалсан. Гэвч Роналдуг хувийн онгоцоор Италид буцах тусгай зөвшөөрөл олгосон байна. Роналду өчигдөр Италид ирж, тусгаарлалтад орсон байна.

Испанийн баг Италид очихоос татгалзлаа

Европын лигийн 1/8 шигшээд Италийн “Интер” баг өчигдөр талбайдаа Испанийн “Хетафе”-г хүлээн авч тоглох байсан. Гэвч Испанийн баг коронавирусийн халдвар эрчимтэй тархаж байгаа Италид очихгүй гэдгээ мэдэгдлээ.
“Хетафе” багийн ерөнхийлөгч Анхель Торрес “Бид Италид очихгүй. Яалаа гэж манай баг өвчний голомтод очих ёстой билээ? Манай багийг торгож, хасч шийтгэсэн ч ялгаа байхгүй. Бид очихгүй. Тамирчдынхаа эрүүл мэндийг эрсдэлд оруулахыг хүсэхгүй байна. Тоглолтыг Италиас өөр газарт шилжүүлэх, эсвэл хойшлуулахыг бид хүссэн” гэв.

Английн премьер лигийн тоглолтууд үзэгчгүй болно

Их Британид коронавирусийн халдвар хурдацтай нэмэгдэж байгаагаас шалтгаалан Английн хөлбөмбөгийн холбоо бүх шатны лигийн тэмцээнийг үзэгчгүй зохион байгуулах шийдвэр гаргалаа.
Улирлын тэмцээнийг тэр чигт нь цуцлах саналыг Засгийн газрын зүгээс гаргасан ч хөлбөмбөгийн холбооны удирдлагууд үзэгчгүй зохион байгуулах, олон нийтийн газар болон паб, уушийн газарт үзүүлэхгүй байхаар шийдвэрлэсэн аж. Одоогоор Их Британид коронавирусээр 459 хүн өвчилж, найман хүн амиа алдан, 19 хүн бүрэн эдгэрээд байна.
Европ тивд голомтлон тархаж буй коронавирусийн улмаас Италийн хөлбөмбөгийн Сери А лиг цуцлагдсан бол Францын “Лиг 1”, Испанийн “Ла Лиг” үзэгчгүй зохион байгуулагдахаар болоод байгаа.

NHL тэмцээнээ зогсоохгүй

Хойд Америкийн үндэсний хоккейн лиг буюу NHL коронавирусийн халдварын улмаас улирлын тэмцээнээ зогсоохгүй гэдгээ мэдэгдлээ. Холбооны албан мэдэгдэлд “NBA-гийн тамирчнаас халдвар илэрсэн тул улирлын тоглолтоо тодорхойгүй хугацаагаар завсарлаж байгаагаа зарласан. Манай холбоо эмнэлгийн шинжээч, судлаач нартай байнга зөвлөлдөн, хамтран ажиллаж байгаа” гэж дурджээ. Одоогийн байдлаар тус лигийн “Коламбус”, “Сан-Хосе” багууд үзэгчгүй тоглох шийдвэр гаргаад байгаа билээ.

эх сурвалж :"Ардчилал таймс сонин"