Улсын онцгой комиссын Шуурхай штабаас мэдээллийн хийж, хэрэгжүүлж буй арга хэмжээ болон албаны шийдвэрийг танилцууллаа.

Энэ үеэр Гадаад харилцааны яамны Консулын газрын дарга Л.Мөнхтүшиг "COVID-19 цар тахлын хэмжээнд хүрсэн энэ цаг үед дэлхийн улс орнууд өдөр бүр онц байдал зарлах, хөдөлгөөн хязгаарлах арга хэмжээг авч байна. Ялангуяа Европын орнууд эрс шийдэмгий арга хэмжээнүүдийг авч хэрэгжүүлж эхэлсэн. Шенгений бүс нутгийн орнууд хоорондоо чөлөөтэй зорчдог байсан бол хилийн хязгаарлалт тогтоогоод байна. Мөн Монголд ирэх нислэгийг түр хугацаанд зогсоосонтой холбоотойгоор нутагтаа ирэх боломжгүй болсон визний хугацаа нь хэтэрч байгаа иргэдийн асуудлыг ГХЯ-наас Элчин сайдын яамдаараа дамжуулан суугаа улсынх нь виз хариуцсан эрх бүхий байгууллагатай хэлэлцээ хийж, тодорхой үр дүнд хүрсээр байгаа. Тиймээс визний хугацаа дууслаа гэж сандрах хэрэггүй. Элчин сайдын яамд уг асуудлыг шийдвэрлэхээр ажиллаж байна. Энэ нөхцөл байдал нь зөвхөн Монгол Улсад үүсээд байгаа асуудал биш бөгөөд дэлхийн 138 оронд үүсээд байна. Тиймээс иргэд байгаа улсдаа тайван байж, хувийн аюулгүй байдлыг хангахыг хүсье" гэв.

Өчигдөр Сөүл-Улаанбаатар чиглэлийн тусгай үүргийн онгоцоор 244 монгол иргэн эх орондоо ирсэн бол өнөөдөр өглөө Берлин-Москва-Улаанбаатар чиглэлийн тусгай нислэгээр 231 иргэн ирээд байна. Харин энэ өдрийн 09:08 цагт Улаанбаатараас хөөрсөн тусгай үүргийн онгоцоор Токиогоос 252 монгол иргэн зорчихоор бүртгэлээ хийлгэж байна.

Эдгээр тусгай үүргийн онгоцоор олон улсын нислэг түр зогссоноор Монгол Улсаас эх нутаг руугаа явах боломжгүй болсон гадаадын иргэд голчлон зорчиж байгаа аж.

 Мөн Тэрээр Солонгосын ЭСЯ-тай ярилцаж,  оюутны визийг хөнгөлөлттэй горимоор үнэ төлбөргүйгээр сунгах асуудлыг шийдвэрлэсэн. Хэрэв аль нэг сургууль гуравдугаар сарын 30-наас өмнө ирэхгүй бол тэтгэлгээ цуцална, сургуулиас нь гаргана гэсэн бол бичгээр ГХЯ-д мэдэгдэх хэрэгтэй. Энэ дагуу асуудлыг шийдвэрлэнэ гэдгийг хэлсэн юм.