Гуравдугаар сарын 16-наас 17-нд шилжих нэг хоногт дэлхий дахинд шинэ төрлийн коронавирусын халдвар авсан хүний тоо 14 мянгаар нэмэгдэж нийтдээ 167 511 боллоо гэж Дэлхийн эрүүл мэндийн байгууллага мэдээллээ. Сүүлийн 24 цагт энэ халдварын улмаас 862 хүн нас барж, анх Ухань хотоос эхэлж гарснаас хойш нас барсан хүний тоо 6606-д хүрсэн байна. Өнгөрөгч 2019 оны арванхоёрдугаар сарын 31-нд Хятадын засгийн газар Ухань хотод шинэ төрлийн өвчин дэлгэрлээ гэж мэдээлсэн юм. Шинэ төрлийн энэ коронавирусыг Дэлхийн эрүүл мэндийн байгууллага албан ёсоор COVID-19 гэж нэрлээд энэ өвчний тархалд цар тахлын хэмжээнд хүрлээ хэмээн гуравдугаар сарын 11-нд албан ёсоор зарласан юм. Өнөөдөр шинэ төрлийн коронавирусын халдвар дэлхийн 151 оронд тархаад байна. Өвчний халдвар анх гарсан Хятадаас хальж одоо ихэнх шинэ тохиолдол хятадаас өөр улсуудад бүртгэгдэж байна гэж Дэлхийн эрүүл мэндийн байгууллага онцолсон байна. “Сүүлийн долоо хоногт COVID-19-ийн тархалт эрчимтэй нэмэгдлээ. Одоо шинэ тохиолдлуудын ихэнх нь Хятадаас өөр бусад улсуудад гарч байна” гэж ДЭМБ-ын Ерөнхий захирал Тедрос Адханом Гебрейесус Женевт хийлгэсэн хэвлэлийн мэдээлэл дээр мэдэгджээ. Зөвхөн Итали улсад гэхэд л өнгөрсөн нэг хоногт гурван мянга гаруй хүн коронавирусын халдвар авч, энэ өвчнөөр 350 хүн нас барж нийт нас барсан хүн 2100-д хүрчээ. Өнөөдөр тус улсад энэ өвчний халдвараар 27900 хүн өвчлөөд байгаа юм.