Шинэ төрлийн коронавирусийг Хятадын Ухань хотод Америкийн цэргийнхэн зориуд оруулж ирсэн гэж БНХАУ-ын Гадаад хэргийн яамны Мэдээллийн газрын даргын орлогч Жао Лизянь Twitter хуудсандаа бичжээ. Хятадын дипломат твиттер хуудсандаа АНУ-ын  өвчлөлд хяналт тавих болон урьдчилан анхааруулах төвийн тэргүүн Роберт Редфилдийн АНУ-ын Төлөөлөгчдийн танхимд мэдээлэл хийхдээ ханиадтай төстэй өвчнөөр хэд хэдэн америк хүн нас барсан гэснийг хавсаргасан байна. Хятадын Гадаад хэргийн яамны төлөөлөгч АНУ-д танай улсад хэчнээн хүн халдвар аваад байна, тэднийг ямар эмнэлэгт эмчилж байгаа юм хэмээн асуужээ. “Америкийн цэргийнхэн энэ халдварыг Ухань хотод оруулж ирсэн байж болох юм. Америк бол ил тод байх ёстой. Энэ талаар Нэгдсэн улс бидэнд тайлбар өгөх ёстой” гэж Жао Лизянь бичсэн байна. Тэр бас коронавирусийг эх оронд нь оруулж ирснийхээ төлөө Америкийн цэргүүд хариуцлага хүлээх ёстой гэхээ мартсангүй. 

эх сурвалж :"Ардчилал таймс сонин"