Сирийн Идлиб мужийн иргэд М4 зам дээр явж байсан Орос-Туркийн эргүүлийн цувааны М-60Т танкийг бүслэн хааж, туг далбаагаар бүрхэн эсэргүүцлээ илэрхийллээ гэж “Цэргийн тоймч” Telegram суваг мэдээллээ. Дүрс бичлэг дээр нутгийн иргэд өөрийнх нь нутагт цэргийн хүчин эргүүл хийж байгааг эсэргүүцэн Туркийн зэвсэгт хүчний танкан дээр гарч уриа хашхиралдаж байгаа нь харагдаж байна. Сирийн энэ М4 авто зам дээр зэвсэгт бүлэглэл өдөөн хатгалга хийсний дараа эндхийн нөхцөл байдлыг тогтворжуулах, аюулгүй байдал хангахын тулд Орос-Туркийн хамтарсан хүчин эргүүл хийж байгаа хэмээн ОХУ-ын Батлан хамгаалах яам энэ сарын 15-нд мэдэгдсэн. Нутгийн ард иргэдийг амьд бамбай болгохоор оролдож байгаа зэвсэгт бүлэглэлүүдийн довтолгоо үйл ажиллагааг хязгаарлахад 15-наас эхэлсэн ийм эргүүл чухал гэж хоёр тал үзэж байгаа аж.
ОХУ-ын Ерөнхийлөгч Владимир Путин, Туркийн Ерөнхийлөгч Тайип Эрдагон хоёр Идлиб мужид гал зогсоох асуудлаар гуравдугаар сарын 5-нд хэлэлцэж тохиролцсон. Харин Сирийн Ерөнхийлөгч Башар Асад Америк, Туркийн цэргийн хүч улс орноос нь гарахгүй бол Дамаск хүч хэрэглэхэд хүрнэ гэж мэдэгдээд байгаа юм. Өнгөрөгч нэгдүгээр сард Сирийн Засгийн газрын цэрэг сөрөг хүчин, террористуудын байрлал руу сөрөг довтолгоо эхэлснээр Идлиб мужид нөхцөл байдал хурцадсаны дараа Орос-Туркийн тал дээд хэмжээнд хэлэлцээр хийсэн. Засгийн газрын хүчин Идлиб мужийн бараг талыг террористуудаас цэвэрлэж Туркийн цэргийн ажиглалтын цэгүүдийг өнгөрсөн. Үүний дараа Анкара энэ бүс дэх цэргийн хүчээ нэмэгдүүлэн Сирийн засгийн газрын хүчний эсрэг “Хаврын бамбай” ажиллагаа эхлүүлээд байгаа юм.