Засгийн газрын ээлжит хуралдааны дараа БСШУС-ын сайд Ё.Баатарбилэг мэдээлэл өглөө.

Тэрээр хэлэхдээ "АШУҮИС-ийн дэргэдэх Монгол-Японы хамтарсан сургалтын эмнэлэг, техник тоног төхөөрөмж, санхүүжилтийн талаар ярилцаж шийдвэрлэлээ. Тус эмнэлгийн үйл ажиллагаа цаашид хэвийн явна. Энэхүү эмнэлгийг хувьчлахгүй, өнөөдрөөс манай яамны харьяанд шилжүүллээ. Өнөөдрийн байдлаар тус эмнэлэгт дүрс оношилоо дуран уламжлал, амбултори гэсэн чиглэлээр ажиллаж байгаа ба ашиглах тоног төхөөрөмжийг авахаар 14 тэрбум төгрөгийг Дэлхийн банкнаас шийдсэн" гэв. 

Мөн тэрээр үргэлжлүүлэн сургууль цэцэрлэгийн хөл хориог сунгах эсэх талаар мэдээлэхдээ  "Коронавирусийн улмаас цэцэрлэг, сургуулийн түр завсарласныг үргэлжүүлэх эсэх саналыг энэ баасан гарагт бид УОК-т хүргүүлнэ.  Мөн энэ шийдвэрийг гаргахдаа эрүүл мэндийн байгууллагынхаа саналыг сонсоно. Тиймээс санал авахаар бид ЭМЯ-д хүсэлт тависан байгаа. Ер нь олон нийтийн зүгээс хоёр саналыг хэлж байна. Нэг хэсэг нь хичээлээ оруулмаар байна гэж байгаа бол нөгөө хэсэг нь хорио цээрийг сунгамаар байна гэдгийг эцэг эхчүүд хэлж байна. Үүнтэй холбоотойгоор нэг шийдвэр гарсан нь төгсөх ангийн 28 мянга гаруй сурагчдад зориулж ЭЕШ-ад бэлдэх, теле хичээлийг агуулсан CD гаргаж байгаа ба 12-р ангийн бүх хүүхдэд өгнө" гэсэн юм.