Коронавирусийн халдвар дэлхийн эдийн засагт нөлөөлж байгаатай холбоотойгоор ОУВС, Дэлхийн банк, ОУХАБ болон санхүүгийн судалгааны байгууллагууд 2020 оны дэлхийн эдийн засгийн өсөлтийг 0.5-1 нэгжээр бууруулжээ. Тухайлбал, Оксфорд Эдийн засаг болон Маккензи дэлхийн эдийн засгийн өсөлтийг хамгийн багадаа 0.5-1.5 нэгжээр, Хятадын эдийн засгийн өсөлтийг хоёр нэгжээр буурахаар тооцоолсон байна. Үүссэн нөхцөл байдалтай холбогдуулан БНХАУ, БНСУ, Япон зэрэг улсууд халдварын эсрэг нэмэлт төслийг батлан эрүүлийг хамгаалах үйлдвэрлэл, үйлчилгээ, ЖДҮ, худалдааны салбартаа 0 хүүтэй зээлийн эх үүсвэрийг олгож, татварын хөнгөлөлт үзүүлж байгаа нь үр дүнгээ өгч байна. Тухайлбал, Их Британи улсын Төв банк бодлогын хүүгээ гурав хувиар  бууруулсан бол Герман улсын Сэргээн босголтын банк хязгааргүй зээлийн шугамыг нээж, Итали улсын Засгийн газар иргэдийнхээ зээлийн төлбөрийг түр зогсоогоод байна.Тэгвэл  манай улс иргэд ААН-үүдэд үүсч байгаа эдийн засгийн хүндрэлийг даван туулах тодорхой хөтөлбөргүй авч хэрэгжүүлж байгаа арга хэмжээ нь үр дүнгүй, хугацаа алдсан хэвээр байна. Монгол Улсын экспортын орлогын 93 хувь БНХАУ-аас орж ирдэг. Тэгвэл энэ  оны эхний хагас жилд  уул уурхайн бүтээгдэхүүнээс орох АМНАТ нэг  их наяд төгрөгөөр, оны төгсгөлд нийт татварын орлого 2-3  их наяд төгрөгөөр тасарч магадгүй гэсэн тооцоог эдийн засагчид хийгээд байгаа. Иймд төсвийн орлогын төсөөллийг бодитой төлөвлөж урд хөрштэй хийх гадаад худалдааны хэлцлүүд, хил гааль болон боомтын үйл ажиллагааг сайжруулахад онцгой анхаарах шаардлага тулгараад буй юм.

эх сурвалж:"Ардчилал таймс сонин"