УУХҮ-ийн сайд Д.Сумъяа­базар шатахуун жижиглэнгээр борлуулах үнийг литр тутамд 50 төгрөгөөр, цаашид дэлхийн зах зээлийн ханштай уялдуулан 200 хүртэл төгрөгөөр үе шаттай багасгах чиглэл өгсөн тухай мэдээлэв. Шинэ коронавирусийн халдвар дэлхийн улс орнуудад тархсантай холбоотой олон улсын зах зээлд газрын тосны үнэ унаад байгаа юм.  Нэг баррель газрын тос оны өмнө 64-65 ам.доллар байсан ч нэгдүгээр сараас хойш ханш унасаар өдгөө  22-28 ам.доллар болжээ. Тиймээс эхний ээлжинд өчигдрөөс (2020.03.19) шатахууны жижиглэнгийн үнийг 50-100 төгрөгөөр бууруулж байгаа аж. Цаашид УУХҮЯ, АМГТГ болон шатахуун импортлогч ААН-үүд хамтран шатахууны жижиглэнгийн үнийг дөрөвдүгээр сарын 15 гэхэд литр тутамд нь 200 төгрөг  хүртэл бууруулах аж.  АМГТГ-ын Газрын тосны газрын асуудал хариуцсан орлогч дарга Ц.Эрдэнэбаяр, “Энэ сард ам.доллартой харьцах төгрөгийн ханш 70 төгрөгөөр нэмэгдсэн ОХУ-ын “Роснефть” компаниас нефтийн хилийн үнийг хоёрдугаар сарын 25-27-нд мэдээлсэн. Үүнд манай улсын хамгийн өргөн хэрэглэдэг АИ-92 шатахуун 58 ам.доллар болж багассан буюу литр тутамд 120-130 төгрөгийн бууралт ажиглагдсан. Ам.долларын ханшийн зөрүү 70 төгрөгийг хасахад бодит үнэ 50 орчим төгрөг болж байгааг үндэслэн тооцоолсон” хэмээв. УУХҮЯ, АМГТГ шатахууны импортлогч ААН-үүдтэй хамтран газрын тосны үнэ түүхэн дэх хамгийн бага үедээ байхад боломжит байдлаар нөөцлөхөөр ажиллаж байгааг мэдээллийн үеэр онцоллоо.