Д.Соёмбо

 Монгол Улсын Засгийн газраас коронавирусийн тархалтын үетэй холбогдуулан, эдийн засгийн арга хэмжээ авч эхлээд буй. Үүний нэг нь, 2020 оны дөрөвдүгээр сарын 1-нээс аравдугаар сарын 1-ний өдөр хүртэл зургаан сарын хугацаанд аж ахуйн нэгж, компаниудыг НДШ-ээс чөлөөлөхөөр болсон явдал юм. Ингэснээр хувийн хэвшил болон тэдгээрт ажиллагсад тус бүр 13 хувийн НДШ-ээс чөлөөлөгдөж буй. Гэхдээ одоогоор “Дээрх шийдвэрийн биелэлтийг хангуулах хууль эрхзүйн орчин бүрдээгүй, хэрэгжүүлэх журам, чиглэл, аргачлал аль нь ч ирээгүй байна” гэдэг мэдээллийг Нийгмийн даатгалын ерөнхий газраас өглөө.
 Иймээс албан байгууллага, аж ахуйн нэгжүүдийн нягтлан бодогч нарт одоогоор тодорхой мэдээлэл байхгүй байна. Энэ талаар “Аушин Монголиа Икүипментс” ХХК-ийн нягтлан бодогч Н.Цогзолмаагаас тодруулахад, “Одоогоор бидэнд тодорхой чиглэл ирээгүй байна. Ямартаа ч төр засаг хувийн хэвшлийнхнийг дэмжсэн шийдвэр гаргасанд баяртай байгаа. Энэхүү шийдвэр нь сонгуулийн шоу битгий байгаасай гэж залбирч сууна” гэсэн юм.
Мөн үүнээс гадна уг чөлөөлөлтөд төрийн байгууллага ба төрийн албан хаагчид хамрагдахгүй аж. Энэ талаар Хөдөлмөр, нийгмийн хамгааллын яам “Нийгмийн даатгалын шимтгэл зургаан сарын хугацаатай чөлөөлөх шийдвэрт төрийн албан хаагчид хамаарахгүй. Хувийн хэвшилд ажилладаг иргэд нийгмийн даатгалын шимтгэл болон хувь хүний орлогын албан татвараас чөлөөлөгдөж, хөдөлмөрийн гэрээнд заасан дүнгээр буюу цалингаа бүтнээр нь авна” гэв.
Харин энэхүү асуудал дээр Иргэний бүртгэл мэдээллийн мэргэжилтэн З.Мөнхзаяа ярихдаа “Төрийн алба хаагч нарыг ялгаварлаж байгаад харамсч байна. Эдийн засаг хүндхэн байгаа энэ үед ипотекийн зээлгүй төрийн албан хаагч гэж бараг байхгүй. Муу, сайн бүх л ажилд төрийн албан хаагчид морь нохой мэт зүтгэдэг. Энэ тахлын үед ч тэргүүн шугаманд эрүүл мэнд, боловсрол, онцгой, цагдаа гээд төрийн албаныхан илүүтэй ажиллаж байна даа. Тэгэхээр бүх л иргэддээ адилхан хандмаар байна” гэсэн юм.

эх сурвалж :"Ардчилал таймс сонин"