“АВТОСТАТ” хэвлэлийн мэдээлж байгаагаар бол хоёрдугаар сард Хятадад автомашины худалдаа 81.7 хувь унаж ердөө 240 мянга болсон гэнэ. Хятадын автомашины үйлдвэрлэгчдийн нийгэмлэгийн мэдээлснээр нэгдүгээр сард эрчээ авсан коронавирусийн халдварын тархалт нь энэ салбарын хэвийн үйл ажиллагааг тасалдуулж, хэрэглэгчдийн эрэлтийг бууруулсан байна. Үүний дүнд энэ оны эхний хоёр сард Хятадын автомашины зах зээл 43.6 хувиар буурч нэг сая 831 мянга болжээ.
Хоёрдугаар сард борлуулалт нь өмнөх оны мөн үеийнхээс буурсан компаниудын тоонд Хятадын автомашин үйлдвэрлэгч томоохон аж ахуйн нэгжүүд орж байна. Энд SAIC Motor Corp гэхэд л борлуулалт нь 87, Great Wall Motor Co, Honda Motor Co 85, Nissan Motors Co-гийнх 80, Zhejiang Geely Holding Group Co-гийн 75, Toyota Motor Corp-ынх 70 хувиар тус тус унажээ.
Шинэ төрлийн коронавирусийн халдварын тархалтын улмаас энэ уналт эхний хагас жил дуустал үргэлжилж болзошгүй гэж Хятадын автомашин үйлдвэрлэгчдийн нийгэмлэг таамаглаж байна. Харин шинэ төрлийн коронавирусийн халдварын тархалт Хятадад зогссоноор автомашины үйлдвэрлэгчдийн ажил сэргэж үйлдвэрлэл нь 60 хувиас 97 хувь болж, ажилчид нь ажлын байрандаа эргэн ирэх хувь 50 байснаа 82 хувьд хүрлээ гэж БНХАУ-ын Аж үйлдвэр, мэдээлэл зүйн дэд сайд Синь Гобинь мэдэгдээд үйлдвэрлэл өнгөрсөн оны мөн үеийнхээ хэмжээнд хүрлээ гэсэн байна.
Үйлдвэрлэл ингэж сэргэж байгаа ч нөгөө нэг том бэрхшээл нь хэрэглэгчдийн эрэлт муу байгаа явдал гэж РИА Новости агентлаг дамжуулжээ. Дэд сайд ч өнөөдөр үйлдвэрлэл сэргэж, үйлдвэрүүд хэвийн ажиллаж байгаа ч эрэлт, худалдаа муу байгаагаас агуулахууд машинаар дүүрч, үүнээс болоод зарим үйлдвэрлэгч үйлдвэрлэлээ танахад хүрч байна гэжээ. Синь Гобины хэлж байгаагаар Засгийн газар үйлдвэрлэл, эрэлт хоёрыг тэнцвэржүүлэх талаар төрөл бүрийн арга хэмжээ хөтөлбөр боловсруулж байгаа аж.

эх сурвалж :"Ардчилал таймс сонин"