Эрүүл мэндийн яамнаас шинэ коронавирусийн халдвартай холбоотой цаг үеийн асуудлаар ээлжит мэдээллээ хийлээ. 

Энэ үеэр тус ЭМЯ-ны олон нийттэй харилцах тандалт шуурхай удирдлагын хэлтсийн дарга Д.Нарангэрэл хэлэхдээ "Өчигдөр Дархан-Уул, Сэлэнгэ аймагт тус бүр нэг нийт хоёр сэжигтэй тохиолдол шинээр бүртгэгдсэн. Сэлэнгэ аймагт тусгаарлагдсан иргэн Турк, Солонгос улсад аялсан. Хэдийгээр гэртээ өөрийгөө 14 хоног тусгаарласан ч уушгинд хатгааны шинж тэмдэг илэрсэн учраас Сэлэнгэ аймгийн эмнэлэгт тусгаарлалаа. Мөн түүний ойрын хавьтлын долоон хүнийг тусгаарласан. Харин Дархан-Уул аймагт тусгаарлагдсан сэжигтэй тохиолдол бол ОХУ-аас ирсэн оюутан. Тусгаарлалтын хугацаанд шинж тэмдэг илэрсэн учраас хавьтал байхгүй” гэв.
ХӨСҮТ-ийн ерөнхий захирал Д.Нямхүү "ХӨСҮТ-д 192, Цэргийн эмнэлэг 42, Замын-Үүдэд тусгаарлагдсан 34 гэх мэтээр нийт 273 хүнд хийсэн давтан шинжилгээгээр коронавирус илрээгүй. Токиогийн онгоцоор ирсэн 26 хүнийг өнөө өглөө ХӨСҮТ-ээс гаргалаа. Дараагийн нислэгээр ирэх иргэдээс ХӨСҮТ 74 хүнийг хүлээж авах бэлтгэлээ хангалаа" гэсэн мэдээллийг өглөө.

ЭМЯ-ны ГХХАХ-ын дарга Б.Янжмаа "Итали Улс дөрөвдүгээр сарын 13 хүртэл хөл хориогоо сунгаад байна. Өнөөдрийн байдлаар тус улсад коронавирусийн 110 мянга гаруй тохиолдол бүртгэгдэж, 1300 гаруй хүн нас бараад байна. Шинж тэмдэггүй халдвар зөөгчид их байгааг улс орнууд мэдээлж байна. Исландад халдвар тээсэн тохиолдлын 50 хувь, АНУ-д халдвар тээгчдийн 25 нь хувь нь шинж тэмдэггүй халдвар тээгчид байв. АНУ-ын нийт хүн амын 90 орчим хувь нь гэрээсээ гарахгүй байгаа" гэв.