ХЭҮК-ын дарга Ж.Бямбадорж “Зөв амьдрах ухаан” ТББ-ын тэргүүн Д.Загдаа нарын утасны бичлэг цахим орчинд задарсан билээ. Үүнд тайлбар хийхээр Ж.Бямбадорж өнөөдөр хэвлэлд хандлаа.

Тэрбээр хэлэхдээ “Юуны өмнө би өөрийгөө хамгаалахын тулд хэвлэлд хандаагүй гэдгийг онцолъё. “Зөв амьдрах ухаан” төвтэй холбоотой материалиуд бидэнд байна. Олон асуудал бий. Г.Загдаа өөрөө надтай холбогдсон. 2018 онд би төвтэй нь очиж танилцсан. Гэр оронгүй, архины хамааралтай хүмүүсийг асарч, тойглож байгаа нь зөв. Гэтэл гомдол тасрахаа больсон. Тиймээс Манайх Ганбаяр гишүүнээр ахалсан шалгалт явуулсан. ХЭҮК бол Монголын бүх байгууллагад шалгалт явуулж, хүний эрхийн төлөө ажилладаг. Гэтэл дийлдэхгүй нэг газар гарсан нь “Зөв амьдрах ухаан” ТББ. 2019 оны нэгдүгээр сараас хойш.

Аргаа бараад бид цагдаа, прокурорт хандсан. Чимээгүй байж байгаад хариуг нь 2019 оны арванхоёрдугаар сарын 26-нд өгсөн. Заналхийлэх шинжгүй гэсэн хариу ирсэн шүү дээ. Үнэндээ “Зөв амьдрах ухаан” төвд боолын нийгэм байна. XXI зуунд шүү дээ. Төрийн шийдвэрийг гүйцэтгэх гээд очихоор нь оруулдаггүй газар. Г.Загдаа төрөөс ганц ч төгрөгний санхүүжилт авдаггүй гэж ярьдаг. Гэтэл 2018 оны жилийн эцсийн байдлаар улсаас 800 гаруй сая төгрөгийн санхүүжилт авсан байдаг. 2013 онд 265 сая, 2014 онд 171 сая, 2015 онд 81 сая, 2016 онд 30 сая, 2017 онд 24 сая төгрөг тус тус олгосныг ХНХЯ-наас олж мэдсэн. Төр иргэдээ анхааръя гэж байгаа бол үүнийг шалгаж, арга хэмжээ авах ёстой. Г.Загдаа төвийнхөө хүмүүсийг хувиасаа тэжээж байгаа гэдэг. Гэтэл ахмад настай хүмүүсийнхээ тэтгэврийг өгдөггүй, ажил хийлгээд цалинг нь өгдөггүй гэх гомдол ирдэг.

Нэг удаа бид гэнэтийн шалгалт хийх үед нэг эмэгтэйн нүд нь хөхөрчихсөн байсан. Манай ажилтан асуухад нь “Загдаад зодуулсан” гэж хариулсан байсан. Гэтэл дараа нь Г.Загдаа Өөрсдийг нь гүтгэсэн гэдэг үндэслэлээр манайхыг шүүхэд өгсөн. Өнөөх зодуулсан гэсэн иргэн нь айсандаа ч тэр үү “Тийм юм болоогүй” гээд ярьснаа үгүйсгэсэн. Тийм л юм болсон.

Бид хоёрын яриа бүхий утасны бичлэг бий. Би уг нь Г.Загдаатай 40 гаруй минут ярьсан юм шүү дээ. Чи дандаа уурлаж, уцаарлан, бухимдаж, хүмүүстэй зүй бус харьцах юм. Битгий тэгж бай гээд эвтэйхнээр ойлгуулахыг хичээсэн төдий. Гэтэл тэр бүхнийг тасдаад, эвгүй ойлгогдохоор эвлүүлсэн байна. Түүнийгээ над руу байнга илгээн, бүтэн жил дарамталсан” гэлээ.