Засгийн газраас дэлхий нийтэд тархаж буй цар тахлын хэмжээнд хүрсэн коронавирусээс урьдчилан сэргийлэх арга хэмжээг дотооддоо чамлалтгүй авч буй нь талархалтай. Гэвч гадаад улс оронд ажиллаж амьдарч, сурч, эмчилгээнд явсан иргэдийн асуудал хүнд байдалд орлоо. Тэдэнд зориулсан урьдчилан сэргийлэх, тусламж дэмжлэг үзүүлэх бодлого орхигдоод байгаа юм. Засгийн газрын авч буй арга хэмжээнд тэдний асуудлыг тусгасан зүйл алга. Эх орондоо ирэх хүсэлт гаргасан иргэдийг тэр дотроо танил талтай дарга нарын хүмүүсийг тусгай нислэгээр эхний ээлжинд татан авч байгаа. Гэвч бодит байдал дээр хэчнээн шууд нислэг явуулаад ч бүгдийг нь авч ирж чадахгүй гэдэг нь тодорхой болсныг УОК-ийн дарга Ө.Энхтүвшин хүлээн зөвшөөрсөн. Мөн тэр тусгай нислэгийн онгоцоор сайд дарга, нарын хүүхэд, ах, дүү хамаатан садан, танил тал хамгийн эхэнд ирж буй мэдээлэл ч олон нийтэд түгээд байгаа. Тэгэхээр гадаадад байгаа иргэддээ тусламж дэмжлэг үзүүлэх зайлшгүй шаардлага үүсээд байна. 

 Тухайлбал, гадаадад эх орондоо ирэх эрх нь хязгаарлагдсан, санхүүгийн хүнд байдалд орсон иргэдэд мөнгөн тэтгэмж олгох, эмнэлгийн үйлчилгээгээр хангах гэрээ хэлцэл хийх зэрэг арга хэмжээ авах цаг аль хэдийнэ болсон. Гэтэл Засгийн газар, төрийн байгууллагаас гадаадад байгаа иргэдэд яг хэрэгтэй оновчтой тусламж үйлчилгээг хүргэж ажиллаж чадахгүй байна. Корона дэлхий нийтийг айлгаж байгаа энэ цагт Монголын төр засгаас гадаадад суугаа монголчуудад чиглэсэн тусламжийн гараа яаралтай сунгах хэрэгтэй байна. Монголчууд онлайнаар эх орон руугаа уйлаад арга тасраад аврал эрж сууна. Энд суугаа ах дүүсийнх нь элэг нь эмтэрч сууна. Ийм хүнд цаг үед гадаадад байгаа монголчуудад цагийг нь олсон тусламжийг яаралтай хийх хэрэгтэй байна. Эрх барьж буй нам болох МАН гадаадад суугаа монголчуудаа хөсөр хаясан энэ цагт сөрөг хүчин болох Ардчилсан нам гадаадад суугаа монголчуудад чиглэсэн арга хэмжээг яаралтай авах саналыг оруулж, туслах гарцыг эрэлхийлж байна. Гадаадад байгаа иргэдийн талаар тоо баримт дурдъя. Одоогоор гадаадаас эх орондоо ирэх хүсэлтийг УОК-т 46 оронд буй  7623 иргэн гаргаад байна. Үүнд, бага насны хүүхэд 830,  эрүүл мэндийн шалтгаантай 85,  ахмад настан 278,  жирэмсэн 32,  визний хугацаа дууссан 250,  орон байрны асуудалтай 409,  оюутан 900,  хүндэтгэн үзэх шалтгаангүй 3800 иргэн байгаа аж. Эдгээрээс гадна  жирэмсэн, өндөр настай, оюутан, түр хугацааны визтэй 30 гаруй мянган иргэн бий. Тэд ч мөн адил эх орондоо ирэх боломжгүй болчхоод байгаа юм. Ийм учраас тэдэнд  төрийн зүгээс бодит тусламж, дэмжлэг үзүүлэх зайлшгүй шаардлага тулгарчхаад байна. Өнгөрсөн оны статистикаас харвал нийт 76 улсад  175 мянган монгол иргэн амьдарч байна. 

эх сурвалж :"Ардчилал таймс сонин"