ХНХЯ-ын сайд С.Чинзориг өнөөдөр мэдээлэл хийлээ. Үйл ажиллагаа нь доголдсон ААН-ийн ажилтнуудад 200 мянган төгрөг олгох журмын талаар мэдээлэл хүргэлээ. 

ХНХЯ-ын сайд С.Чинзориг: Үйл ажиллагаа нь доголдсон ААН-ийн ажилтнуудад сар бүр 200 мянган төгрөг олгох шийдвэрийг Засгийн газраас гаргасан. Холбогдох журмыг ХНХЯ болон Сангийн яам хамтран боловсруулсан. Журмыг ирэх долоо хоногийн Засгийн газрын хуралдаанаар эцэслэн хэлэлцэж батлана.

Гэхдээ журмыг энэ сарын 1-нээс эхлэн тооцож хэрэгжүүлнэ.  200 мянган төгрөгийн урамшууллыг зөвхөн хувийн хэвшлийнхэнд олгоно. Харин хувиараа хөдөлмөр эрхлэгчид ажилгүйдлийн даатгал төлдөггүй учраас энэ жухамд хамаарахгүй. 

 Сар бүрийн 20-25-ны өдрүүдэд хүүхдийн мөнгийг олгодог. Энэ сараас эхлэн гурван сарын турш бүх хүүхдэд 20 биш 30 мянган төгрөг олгоно. Үүний тулд ямар нэг шинэ журам батлах шаардлагагүй.  

Капитал банканд Нийгмийн даатгалын сангаас байршуулсан мөнгөн хөрөнгийг улсын төсвийн хөрөнгөтэй адилтган үзэх хүсэлтийг НДС-гаас гаргасан юм. Энэ хүсэлтийг шүүх хүлээн авч, өр барагдуулах дарааллын 8 дугаарт байсныг урагшлуулсан. Ингэснээр дарааллын тавдугаарт оруулаад байна. Учир нь нийгмийн даатгалын сангийн үлдэгдэл хөрөнгийг хадгаламж хэлбэрээр байршуулсан юм. Монголбанкнаас томилсон эрх хүлээн авагч Нийслэлийн Захиргааны хэргийн шүүхийн энэ шийдвэрийн эсрэг нэхэмжлэл гаргахгүй гэсэн мэдээллийг би авсан.