Эрдэнэс Тавантолгой компанийн уурхайчид эсэргүүцэл үзүүлэн алхалт хийж байна. Тодруулбал, Эрдэнэс Тавантолгой компани IPO гаргах нэрийдлээр охин компани байгуулж, 100 хувийн Хятадын хөрөнгө оруулалттай компани оруулан иржээ. Уурхайчдын хэлж буйгаар Зүүн цанхийн уурхайд хятадууд эзэн сууж, монгол залуусыг үндэслэлгүйгээр ажлаас нь чөлөөлж, үүнийг эсэргүүцсэн уурхайчдад ажлын дарамт үзүүлж буй гэнэ.
Одоогийн байдлаар есөн ажилтныг эсэргүүцэл үзүүлсэн хэмээн ажлаас халаад байгаа гэнэ.
Мөн уурхайчид МАН Зүүн Цанхийн уурхайг хятадуудад зарж, сонгуулийн санхүүжилт босгох гэж байна хэмээн хардаж буйгаа илэрхийлсэн юм.
2016 оноос хойш Зүүн цанхийн уурхайд дөрвөн жилийн турш хөрс хуулалт хийж, нүүрс нь гарч ирэхэд Засгийн газраас “Эрдэнэс Тавантолгой майнинг” компанийг үүсгэн байгуулж, хятад компаниар нүүрсээ ухуулахаар завдаж байна. Нэг уурхайд хоёр компани байгуулах ямар ч шаардлагагүй. Үүнийг мөнгөний үнэр авсан хулгайч нарын хийж байгаа ажил гэж харж байна. Тиймээс үүнийг эсэргүүцэн Тавантолгойн уурхайн ажилчид ард түмний өмчөө хамгаалахын төлөө тэмцэж байна. хэмээн “Эв санааны нэгдэл” үйлдвэрчний эвлэлийн гишүүд ярилаа.
Эв санааны нэгдэл үйлдвэрчний эвлэлийн тэргүүн С.Эрдэнэ хэлэхдээ “Ашигтай ажиллаж байгаа Эрдэнэс Тавантолгой” компанийг Уул уурхайн сайд Д.Сумъяабазар өөрийн хамаарал бүхий этгээдүүдтэй нийлж, хуйвалдан авч байна. Энэ бол том гэмт хэрэг. Бид дөнгөж тэмцэж эхэлж байна” гэв.
Тэд Засгийн газрыг “Эрдэнэс Тавантолгой майнинг” компаниа татан буулгахыг шаардаж байгаа юм. Мөн тэдний шаардлагыг хүлээж авахгүй бол тэмцлийн дараагийн хэлбэрт шилжин, өлсгөлөн зарлана гэдгээ мэдэгдээд байна.