Маргааш УБ, Сэлэнгэ, Дархан руу орох, гарах хөдөлгөөнийг 06:00 цагт нээнэ. Энэ талаар ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан мэдээлэл хийв. Тэрээр хэлэхдээ "2020 оны дөрөвдүгээр сарын 21-ний өдөр COVID-19 халдвар илэрсэн тохиолдол дээр судалгаа хийн, УОК-ийн шийдвэрээр Улаанбаатар хот, Дархан-Уул, Сэлэнгэ аймгийн орох, гарах хөдөлгөөнийг хаасан.

Өнөөдөр Сэлэнгэ, Дархан-Уул аймгийн Онцгой комисс болон УОК-ын шуурхай штаб хуралдаад ЭМЯ, Мэргэжлийн хяналтын газар, Цагдаагийн байгууллагын хамтарсан судалгаа, шинжилгээний ажлууд хэвийн явагдаад дууссан тул маргааш замын хөдөлгөөнийг нээх боломжтой гэж үзлээ.

Тиймээс Дархан-Уул, Сэлэнгэ аймаг болон Улаанбаатар хотын орох, гарах хөдөлгөөн маргааш буюу дөрөвдүгээр сарын 25-ны өглөө яг 06:00 цагаас нээгдэнэ.

Гэнэт зам хааж, ажилд саад учрууллаа гэсэн иргэдийн гомдол нэлээд байна. Цар тахлын аюул нь өөрөө гэнэт гарч ирдэг зүйл.

Монгол Улс дотроосоо халдвар гаргахгүй байх тал дээр хичээж, арга хэмжээ авч байна. Дотроосоо халдвар гараагүй ийм улс, орон цөөн байгаа.

Гэхдээ тайвширч болохгүйг дахин сануулья. Иргэн бүр хорио цээрийн дэглэмийг чанд мөрдөх шаардлагатай.

Зам хаах шийдвэрийг хүлээн авч цагдаагийн байгууллагын шаардлагыг биелүүлсэн иргэддээ талархаж байна" гэв.