ЭМЯ-наас шинэ төрлийн коронавируст халдварын талаарх цаг үеийн ээлжит мэдээллээ өнөөдөр хүргэлээ. Энэ үеэр ХӨСҮТ-ийн захирал Д.Нямхүү өчигдөр хийсэн шинжилгээний хариуг танилцууллаа. 

Тэрбээр хэлэхдээ “Дөрөвдүгээр сарын 30-нд Монгол Улсад коронавирусийн сэжигтэй тохиолдол бүртгэгдээгүй. Зарим хүмүүст давтан шинжилгээ хийхэд коронавирус илрээгүй.

Өчигдөр Сөүлээс чартер нислэгээр ирсэн иргэдийн тавыг нь сэжигтэйд тооцон ХӨСҮТ-д тусгаарллаа. Үлдсэн хүмүүсийг ажиглах байрууд руу хуваарилж, байршуулсан байна. Өнөөдөр тэднээс эхний шинжилгээгээ авна. Аюул өнгөрөөгүй, урд байна. Одоо дахиад хоёр чартер нислэгээр иргэдээ авна. Ялангуяа маргааш ирэх Франкфуртын нислэгийг нэлээн хүнд, эрсдэлтэй гэж тооцож байна” гэсэн юм.

Мөн тэрбээр халдвар авсан өвчтөнүүдийн халуун нь багасаж, биеийн байдал дээрдэж байгаа. Мөн эмч, ажилтнуудын аюулгүй байдалд зөвлөмж өгч ажиллаж байна. Франц иргэнийг эмчилж байгаад халдвар авсан гэдэг нь худлаа. Худал мэдээлэл тараасан иргэдэд хариуцлага тооцох ёстой гэдгийг онцоллоо.