Эрүүл мэндийн яамнаас мэдээлэл хийж байна.
Дэлхий даяар өнгөрсөн 24 цагт 76 мянган хүн шинээр халдвар авч, 3000 гаруй хүн нас барлаа. Одоогийн байдлаар манай улсад 42 хүн халдвар авсан нь батлагдаж, 14 хүн эмчлэгдсэн байна. Мөн Улсын хэмжээнд 986 хүн ажиглалтад байна. 

ХӨСҮТ-ийн Тандалт судалгааны албаны дарга А.Амбасэлмаа "Тавдугаар сарын 10-нд улсын хэмжээнд ХӨСҮТ болон  Дархан-Уул аймгийн лабораториудад нийт 107 хүнд шинжилгээ хийлээ. 82 хүнд давтан шинжилгээ хийхэд коронавирус илрээгүй. Мөн ачаа тээврийн 25 жолоочийн шинжилгээнд коронавирус илэрсэнгүй. Өнөөдрийн байдлаар ХӨСҮТ-д 107 хүн байна. Халдвартай 30 хүнээс хоёр хүний бие хүндэвтэр байна. Энэ долоо хоногт Франкфуртын онгоцоор ирсэн иргэдийн давтан шинжилгээг хийж дуусна" гэлээ. 

ЭМЯ-ны Гадаад харилцаа, хамтын ажиллагааны газрын дарга Б.Янжмаа "Иран улсад шинэ тохиолдлын тоо өдөрт дунджаар 1500-гаар нэмэгдэж байна. Тиймээс энэ даваа гарагаас эхлэн тав хоног хөл хорио тогтоохоор шийдвэрлэсэн байна. Харин Их Британид энэ даваа гарагаас эхлэн гэрээсээ ажиллах боломжгүй хүмүүс ажилдаа явах, лхагва гарагаас иргэд гадаа салхилж, нарлах дасгал хөдөлгөөн хийх боломжтой гэж мэдээлжээ.
БНСУ-д шинээр 35 тохиолдол бүртгэгдэж, 10900 хүн халдвар авсан нь батлагдлаа. Японд шинэ 70 тохиолдол бүртгэгдэж, есөн хүн нас баржээ.