Хотын дарга асан, “Гэр хороолол хөдөлгөөн”-ий тэргүүн  Э.Бат-Үүл өнөөдөр цаг үеийн асуудлаар мэдээлэл хийлээ.

Тэрбээр хэлэхдээ “Сүүлийн үед МАН болон тус намын ЕНБД Д.Амарбаясгалан Монголын топ сэтгүүлчдийг ашиглан миний эсрэг улайрсан гүтгэлгийн үйл ажиллагаа явуулж байна. Сэтгүүлч Лодойсамбуугийн “Улаан бал” нэвтрүүлэг, Tovch.mn сайтын мэдээг эх сурвалж болгосон сэтгүүлч Батбилэгийн нэвтрүүлэг, болон Монголын бүх телевизүүдээр төлбөртэй мэдээлэл цацлаа. Энэхүү нэвтрүүлгүүдээр “Аав хүү хоёрын хэрэг” хэмээх зохиомол хэргийн тухай үзүүлэхдээ миний биетэй холбогдох хавтаст хэргийн материалыг илтэд мушгин гуйвуулж, гүжирдсэн. Намайг хулгайч, дээрэмчин, алуурчин болгож гүтгэх ажиллагааг МАН 30 жил явуулж байгаа. Өнөөдөр намайг гэмт хэрэг үйлдсэн мэтээр олон нийтийн тархийг угааж байна. Шүүхээс өмнө гэмт хэрэгтэн болгож байгаад туйлын харамсаж байна. Шүүхийн дараа ямар муухай гүтгэлэг байсныг олон нийт мэдэх болно. Тиймээс МАН-ын дарга У.Хүрэлсүх, Д.Амарбаясгалан нарыг нийслэлийн гэр хороололд, тэр тусмаа Баянзүрх дүүрэгт нэр дэвшиж надтай өрсөлдөхийг уриалж байна. Хүний ар худрагаар гүтгэхээ боль. Намайг УИХ-д З.Энхболдтой өрсөлдөн гэсэн тэр агшнаас хойших У.Хүрэлсүх, Амарбаясгалан нарын дайралт эхэлсэн. Тэсэж суухад бэрх боллоо. Шүүхээр намайг ямар нэгэн байдал хүргэнэ гэсэн заналхийлэл байгаа гэж хардаж байна. Шүүхийн шийдвэр эцэслэн гартал би гэм буруугүй. Сая Монгол Улсын Ерөнхий сайд асан М.Энхсайханыг ямар байдалд оруулсныг харлаа. Тэр хүн бол хамгийн шилдэг ерөнхий сайдуудын нэг байсан. Өнөөдөр намайг ч ийм байдалд оруулахаар зэхэж байна. Шүүхээр хүнийг айлгадаггүй юм шүү гэж хэлмээр байна. Д.Амарбаясгалан хотын дарга болохоор санаархаж байгаа. Манай нийслэлчүүд ЖДҮ-чнээр хот удирдуулах болоогүй” гэлээ.