Б.Болороогийн нөхөр өнгөрөгч оны зургадугаар сарын 19- 20-нд шилжих шөнө харамсалтайгаар амь насаа алдсан юм.
Гэвч шүүх эмнэлгийнхэн Б.Болороогийн нөхрийг хариуцлага алдаж, ажлын байран дээрээ архидан согтуурч байгаад лифтний хонгил руу унаж нас барсан гэж дүгнэсэн. Харин Б.Болороо хэрэг гарснаас хойш өнөөдрийг хүртэл ханийнхаа нэр хүндийг сэргээн, хуулийн байгууллагын хуудуутай шийдвэрийн алдааг нотлохын төлөө зүтгэснийх нь үр дүн гарлаа. Шүүх эмнэлгийн шинэ дүгнэлтээр Б.Болороогийн нөхрийг архи уугаагүй болохыг баталжээ.
Б.Болороо энэ тухай өөрийн сошиал хуудсандаа:
Ханийнхаа нэрийг сэргээж чадсан. Шүүх эмнэлгийн дахин бүрэлдэхүүнтэй шинжээчдийн дүгнэлтээр алкохол хэрэглээгүй нь тогтоогдсон, өөрөөр хэлбэл 2.4 промилл хэмжээ нь согтолтын зэрэг биш тэр дор 19 хоног байж өмхийрч, муудсанаас бий болсон исэлтээс үүдсэн хэмжээ гэж гарсан.
Мөн МХЕГ-аар дахин бүрэлдэхүүнтэй шинжээч томилуулан дүгнэлт гаргахад, миний хань буруугүй, компанийн 100 хувийн буруу гэж гарсан. Миний эцсийн, цор ганц хүсэл бол ханийнхаа нэрийг л цэвэрлэх байсан. Би зорилгодоо хүрсэн, гэхдээ өөрийн сайндаа биш та бүгдийн дэмжлэгээр. Бид ямар ч зүйлд нэгдэж чадвал ялж болдог юм байна, үнэн илэрдэг юм байна шүү.
Эхнээсээ намайг дэмжиж, урам өгсөн, зоригжуулсан, чи ганцаараа биш шүү гэж урагшлах итгэл хайрлаж байсан, хайрлаж байгаа та бүхэндээ баярлалаа. Худал хуурмаг зүйлтэй эвлэрээд сууж чадахгүй байгааг минь хараад хүсэл, санааг минь ойлгож бүх зүйлд минь хамт байж тэмцсэн ээждээ онцгойлон баярлалаа. Тун удахгүй хавтаст хэрэгтэйгээ танилцсаныхаа дараа та бүхэнд дэлгэрэнгүй мэдээлэл хүргэх болно оо. Бие нь энэ орчлонд байхгүй боллоо ч үр нь үлдсэн хорвоод нэр нь цэвэр яваг ээ хэмээсэн байна.
Б.Болороо талийгаач нөхрийнх нь хэргийг үнэн мөнөөр шийдвэрлэж өгөхийг хүсч, өвлийн хүйтнийг ажрахгүйгээр Сүхбаатарын талбайд ээжийнхээ хамт суулт зарласан. Ерөнхий сайдыг болон ЦЕГ-ын даргад шаардлага хүргүүлж байв. Ерөнхий сайдыг өөр дээрээ ирүүлж, хавтаст хэргийг Нийслэлийн цагдаагийн удирдах газар луу шилжүүлж шуурхай шийдвэрлүүлж тэр чадсан. Ийнхүү Б.Болороо суултаа зогсоож, хэргийг үнэн зөвөөр шийдвэрлэнэ гэдэгт нь итгэж буйгаа илэрхийлсэн юм. Гэвч тус үйл явдал болсноос сарын дараа Б.Болороо сошиал хуудсандаа дахин бичиж байсан.
Бүхэл бүтэн 11 сар шөнө унтах ч сөхөөгүй, бүтэн нойртой хонож үзээгүй тэмцсэн Б.Болороо яллаа. Үнэн хэзээд ялдгийг энэ үйл явдал баталлаа. Б.Болороо болон түүний гэр бүлийн энэ бүх хугацааны тэмцэл нь оргүй хоосон зүйл биш байсныг дахин ийнхүү харуулав.