Онцгой байдлын ерөнхий газар, Цаг уур орчны шинжилгээний газраас ойрын өдрүүдийн цаг агаарын мэдээллийг өглөө. Маргаашнаас төвийн аймгуудын ихэнх нутаг, баруун аймгуудын нутгийн зүүн хэсэг, зүүн аймгуудын нутгийн хойд хэсгээр, 16, 17-нд төвийн аймгуудын нутгийн зүүн хойд, зүүн аймгуудын ихэнх нутгаар бороо болон нойтон цас орно. Зарим нутгаар байгаль, цаг агаарын гаралтай гамшигт болон аюултай үзэгдэл болохоор байгааг анхаарууллаа.

Цаг уур орчны шинжилгээний газрын Урьдчилан мэдээлэх хэлтсийн дарга Л.Оюунжаргал "Маргааш өдөр Хэнтий, Сүхбаатар, Говьсүмбэр, Дорноговийн нутаг, Төв, Дундговийн зүүн хэсгээр салхи секундэд 26-28 метр, зарим үед 34 метр хүртэл ширүүсэн хүчтэй шороон шуурга шуурч, Төв, Хэнтий аймгийн хойд хэсгээр хүчтэй цасан шуурга шуурна. Эдгээр аймгуудад цаг агаарын гамшигт үзэгдэл болох нь. Мөн өдөр Өвөрхангай, Өмнөговь, Дорнодын нутаг, Төв, Дундговийн баруун хэсгээр салхи секундэд 16-18 метр, зарим үед 24 метр хүртэл ширүүсэн, хүчтэй шороон шуурга шуурна. Энэ бол цаг агаарын аюултай үзэгдэл.

14-нөөс 15-нд шилжих шөнө төвийн аймгуудын нутгийн хойд хэсгээр, 15-нд төв, говь, зүүн аймгуудын нутаг, 16.17-нд нутгийн зүүн хагаст, ялангуяа Хэнтий аймгийн нутгаар нойтон цас орж, хүчтэй шороон болон цасан шуурга шуурч, эрс хүйтрэхийг онцгойлон анхааруулж байна. Яагаад гэвэл 2008 оны тавдугаар сарын 26-27-нд дээр дурдсан аймгуудад болсон цаг агаарын гамшигт үзэгдэлтэй маш төстэй байгаа учир онцгойруулж байгаа гэдгийг санаарай.

Гамшигт үзэгдэл нь хэдий байгалийн давагдашгүй хүчин зүйл боловч иргэд анхаарал хайхрамжаа алдахгүй байвал ямар нэгэн хохиролгүй өнгөрүүлэх боломжтой. 2008 оны тавдугаар сарын 26-ны өглөө цаг агаар тогтуун дулаахан байсан. Энэ удаагийн үзэгдэл яг түүнтэй адил байх төлөвтэй байна. Маргааш өглөө эдгээр аймгуудад сайхан дулаахан, багавтар үүлтэй байх ч 14:00 цагаас хойш температур огцом унаж, цасан болон шороон шуурга шуурна. Тийм учраас өглөөний наранд хууртаж, нимгэн хувцастай гарахгүй, хүүхдээ малд явуулахгүй, малаа холын бэлчээрт гаргахгүй байхыг анхааруулж байна. 2008 онд өглөөний наранд хууртсанаас болоод хүний амь эрсдэхэд хүрсэн. Мөн малаа эрт бэлчээрт  гаргаад эргүүлж хашиж амжилгүй, уруудсан мал Хэрлэн голд олноороо үйсэн.

16-ны өдрөөс үзэгдлийн эрч хүч нь буурах хэдий ч зүүн гурван аймгийн нутгаар 16-17-нд үргэлжлэн хур тунадас орж, хүчтэй салхи, шороон болон цасан шуурга шуурах тул урьдчилан сэргийлэх, бэлтгэл хангах зэрэг арга хэмжээ авахыг онцгойлон анхааруулж байна" гэлээ.