ОХУ-аас ирсэн 37 оюутны шинжилгээнээс коронавирус илэрчээ. Ингэснээр ОХУ-аас ирсэн 55 сонсогчийн шинжилгээний хариу эерэг гараад байна. Харин Улсын хэмжээнд коронавирусийн нийт бүртгэгдсэн тохиолдол 98 боллоо.

Үүнээс 15 хүн эдгэрэн, ХӨСҮТ –ээс гарч, дараагийн хяналт руу шилжсэн билээ.

ХӨСҮТ-ийн захирал Д.Нямхүүгээс халдартай иргэдийн эм, тариа, байрлах байрны хүрэлцээний талаар тодруулахад тэрбээр “ХӨСҮТ-д 250 ор бэлдсэн байгаа. Өнгөрсөн таван сарын хугацаанд бид нилээн сайн бэлтгэл хийсэн. Эмчилгээнд зориулсан эм тарианы хангамжийг хангалттай бэлтгэгдсэн байгаа. Мөн эмнэлгийн хувийн хамгаалах хэрэгсэл хангалт сайтай байна гэж үзэж байна. Цаашдаа хэрэгцээтэй хамгаалах хэрэгсэлээ нэмэх, нөхөн хангалт хийх талаар яригдаж байна. Одоогийн нөхцөлд бол бүх бэлэн байдлаа сайн хангасан байгаа. Засгийн газраас онцгой анхаарч бидэнд хэрэгтэй багаж төхөөрөмж, оношлуурыг хангалттай хэмжээнд авч өгсөн” гэлээ.

Одоогийн байдлаар ХӨСҮТ-д 83 халдвартай иргэн эмчлүүлж байна.

Мэдээллийн үеэр ХӨСҮТ-ийн захирал Д.Нямхүү халдвартай нь тогтоогдсон, эмчлүүлж буй иргэдээ сэтгэл санаагаар дэмжиж, туслахыг уриаллаа. Тэрээр хэлэхдээ “Хүний сэтгэл санаа гэдэг хамгийн чухал байдаг. Сэтгэл санаагаар унах нь эмчилгээний үр дүнд нөлөөлдөг. Сэтгэл санаа муу, санаа зоволттой байх нь хувь хүний дархлааг маш сулруулдаг. Тиймээс халдвартай нь тогтоогдсон хүүхдүүдээ сэтгэл санаагаар дэмжих нь та бүхний бидний эмчилгээнд оруулж байгаа хувь нэмэр юм шүү. Голомттой бүс нутагт байгаа иргэдээ татан авах нь бидний үүрэг. Бид дэлхийд цөөхүүлээ, гуравхан сая иргэнтэй. Тиймээс иргэдээ татан авах нь хамгийн зүйтэй” гэлээ

Мэдээллийн сүүлд Д.Нарангэрэл хэлэхдээ “Бид энэ таван сарын хугацаанд сайн туршлага хуримтлуулсан. Тиймээс дараагийн нислэгийг хүлээж авахад сэтгэл зовох зүйл алга. Үүргийн онгоцоор ирж байгаа иргэдийн 10-15 хувиас халдвар илэрч байна. Тиймээс иргэдээ татан авах хугацааны хувьд багахан зайтай байх нь бидэнд бэлтгэх мөн багахан амьсгаа авах боломжийг өгнө гэж дархвар судлалын үүднээс дүгнэж байна” хэмээлээ.