ЭМЯ-ны ээлжит мэдээллээр ХӨСҮТ-ийн ерөнхий захирал Д.Нямхүүгийн шинжилгээний хариунуудыг танилцууллаа.

Тэрбээр, Тавдугаар сарын 14-ний өдөр 381 хүнд шинжилгээ хийснээс коронавирус илрээгүй. ХӨСҮТ-ээс таван хүн эдгэрч эмнэлгээс гарч байна.Тэднийг дараагийн шатны ажиглалтанд шилжүүлнэ. Эдгэрсэн таван хүний дөрөв нь 20-21 насны оюутан, нэг нь 50 гаруй насны эмэгтэй байгаа.  Ингээд одоогийн байдлаар эдгэрсэн хүний тоо 20 боллоо.

Манай улсад коронавирусийн халдварын 98 тохиолдол батлагдсанаас 78 хүн эмчлүүлж байна. ХӨСҮТ-д 171 хүн эмчилгээ хийлгэж, ажиглалтад байна. Тэдэнд 34 эмч, эмнэлгийн ажилтнууд эмчилгээ, үйлчилгээ үзүүлж байгаа. Өчигдөр буюу Тавдугаар сарын 14-нд ХӨСҮТ-ийн хоёр лаборатори болон Дархан-Уул аймгийн вирус судлалын салбар лаборатори, ЗӨСҮТ-ийн лабораторид нийт 381 хүнд шинжилгээ хийлээ. Бүгдэд нь коронавирус илрээгүй.

Өвчтөнүүдийн дунд хүндэрсэн хүн ховор байна. Дэлхийн хэмжээнд халдвар авсан хүмүүсийн 80 хувь нь хөнгөн хэлбэрээр өвчилж байгаа.

Эхний ээлжинд эмчилгээ хийгээд тусгаарлалтаас гарсан Чинбаяр, Ууганбаяр нарын сэхээний шилдэг эмч нар өглөө бүхэн дотор тусгаарлалтад байгаа эмч нартайгаа онлайнаар холбогдож, эмчилгээний тактикаа боловсруулан ажиллаж байна.