ДЭМБ-ын Монгол Улс дахь суурин төлөөлөгч С.Диордица УИХ-ын даргын хүсэлтээр Монгол Улсын иргэдэд хандаж мэдээлэл хийлээ. Тэрээр хэлэхдээ "Монгол Улсад жил бүр 11-12 дугаар сард томуугийн улирал эхэлдэг. Олон нийт энэ үеэр Монголд коронавирус орж ирээд дууссан гэж ярьж байгаа нь шинжлэх ухааны ямар ч үндэслэл байхгүй. Энэ өвчнийг анх 2019 оны 12 дугаар сараас өмнө шинжлэх ухаан олж тогтоогоогүй байсан, шинэ өвчин юм. ДЭМБ болон Монгол Улсын Засгийн газар худал ташаа мэдээг үгүйсгэхээр хичээж байна. Ташаа мэдээ нь халдвараас ч илүү бидэнд аюул авчрах сөрөг нөлөөтэй юм. Тиймээс аль хэдийн надад дархлаа тогтсон гэж өөрийгөө болон өрөөлийг битгий аюулд учруулаарай. Найдвартай эх сурвалжаас баттай мэдээ авч бидний ажилд туслахыг хүсэж байна" хэмээсэн юм. 

Мэдээллийн дараа тэрбээр сэтгүүлчдийн асуултад хариуллаа. 

-Сүүлийн үеэд халдвар зогсохгүй, тиймээс цаашид энэ байдалдаа дасан зохицохыг хэрэгтэй гэсэн мэдээллүүд яригдаж байна. Ийм үед хөл хориог сулруулах нь хүмүүст энэ өвчнөөс айх аюулгүй гэсэн ойлголт төрүүлж байна?

-Бидний үзэж буйгаар, вакцин гарах хүртэл амиа алдах хүмүүсийн тоо нэмэгдэх байх. Тиймээс одоогийн энэ байдалд дасан зохицож өөрийгөө хамгаалах нь зүйтэй. Мэдээж хязгаарлалтын улмаас эдийн засаг болон нийгэмд сөргөөр нөлөөлж байгааг ойлгож байна. ДЭМБ-ын ерөнхий захирал хөл хориогоо тайван, удаан сулруулах хэрэгтэй гэсэн зөвлөмжийг өгч байгаа. Хэвийн болгох гэж яарвал олон нийтийн дунд эргэлзээ бий болгох аюултай. Бид аль болох тэнцвэртэй шийдвэр гаргахыг хичээж байна. 

-Энэ өвчний вакцин хэзээ гарах вэ?

-Вакцин үйлдвэрлэгчдээс сайн мэдээ гарч эхэлсэн. Гэхдээ зарим нь 12 сар, зарим нь 18 сарын дараа үйлдвэрлэх боломжтой гэж мэдэгдсэн. Бид бүхэн вакцин гарахыг хүсэн хүлээж байна. Дэлхийн эрүүл мэндийн тэргүүлэх мэргэжилтэн найз маань надад вакцин гарах магадлал маш өндөр байгаа гэсэн мэдээллийг өгсөн. 

-Цар тахлын үед Монгол Улс сонгууль хийх гэж байна. ДЭМБ-аас ямар зөвлөмж өгөх вэ. Ер нь ийм нөхцөлд сонгууль хийх нь зөв үү?

-ДЭМБ-ын гол зорилго нь ямар ч үед олон нийтийн эрүүл мэндийг хангах ёстой. Олон хүн цугларах шаардлагатай үед бид бүх боломжоороо дэмжиж хамтран ажиллах болно. 

-Зарим эх сурвалжаас цар тахал 4-5 жил үргэлжилнэ гэсэн мэдээлэл гарч байна. Дэлхийн ЭМЯ ямар байр суурьтай байгаа вэ?

-Миний хувьд, цар тахал түүнээс өмнө дарагдана гэж найдаж байна. Монгол Улс, БНХАУ, БНСУ, Вьетнам зэрэг улс вакцин байхгүй ч хязгаарлах, тусгаарлах арга хэмжээг дорвитой авснаар халдвар тархах эрсдэлийг зогсоож байна. Өмнө нь бид  H1N1 халдварыг вакцин гарснаар дарсан. Үүний адил вакцин гарвал нөхцөл байдал өөр болно.